23 Lwezi 2025
Ngu Liberty Mutamba
Namhla lilanga lokugqiba umdlalo we 2024/25 sizini ye Castle Lager Premier league, ilanga leli likhathaza abalandeli abanengi nanko phela amaqembu alitshumi edlela evalweni lokuqunywa lizembe.
Amaqembu amakhulu abalisa iHighlanders, Chicken Inn, Dynamos, Manica, engehluleka ukungqoba namuhla alakho ukuzithola esedlala kuDivision one ngomnyaka ozayo.
Phambilini bekulemizamo yokuba kuyengezwe amaqembu ku PSL . IZIFA isikubeke mgceke ukuba kuqunywa amaqembu amane kulisizini.
Amaqembu la, kumidlalo efika amatshumi amathathu lantathu(33) anqobe okungaphansi kwetshumi (10) kuphela. Kuthi iqembu le Kwekwe United lona linqobe kanye. iKwekwe seku sobala ukuba izembe selingene egumeni labo.
Namhla Highlanders le Chicken Inn ziza ngqikilana eBarbourfields, kuthi etshonayo izaqhuba umnyaka ozayo ikuDivision One.
IDynamos yona izagiqa le Platinum FC enkundleni ye Rufaro. Nyakenye iqembu le Bulawayo Chiefs laqhunywa lizembe okwenze laqeda isizini le ligijima ku Southern Region Division One.
Ngokusebenza nzima kuDivision One selibuyele njalo ku Premier league.
Inkezo yalonyaka ithethwe liqembu elitsha kuleague iScotland FC, izolo enkundleni yeAscot lapho ebeliqiba isizini leqembu le TelOne FC.
Kusenjalo iSuperstikers FC izasukumisa inkezo yabo yokungqoba ku Matabeleland South Division Two. Iqembu leli selizagijima kuDivision One ngomnyaka ozayo.
iSuperyoyoyo izabe ingqikilana leqembu le Supersport FC enkundleni ye Prison Ground (eGodini) edolobheni le Gwanda namhlanje emini.
