15 Mpandula 2026
Ngu Liberty Mutamba
ENQAMENI-Induna uMathema ohlala eGwanda North sexwayise izakhamizi zakulowo mango ukuthi zitshiye ukunatha intshengu esigabeni sakhe, lokhu kuza ngemva kokuba intsha isiqedwe yilobutshwala.
UMathema uyethule amazwi ebika ukuba u10 Mpandula lilanga lokucina labantu abathengisa labathenga lobutshwala, esigabeni sakhe.
Induna ithembise isigwebo sembuzi ezinhlanu kusiya kutshumi kubantu abazatholakala bethengisa intshengu, kuthi umuntu ozabe enatha uzagwetshwa imbuzi ezintathu.
“Kulohlelo olwe ‘Hatshi esigabeni sami’ olwenziwa endaweni ezitshiyeneyo ngibika ukuthi abantu abahlala esigabeni sami batshiye ukunatha intshengu. Abazathokala bethengisa intshengu esigabeni sekulesigwebo sembuzi ezihlanu kusiya kutshumi. Kuthi ozabe eyinatha uzathola isigwebo sembuzi ezintathu. Kusigwebo lesi imbuzi eyodwa izanikwa umuntu oyabe elethe loludaba enduneni. Ngilixwayisa ukuthi intshengu ayisafuneki lapha eNqameni,” kubika uMathema.
UMathema sethembise ukuxotsha labo abathengisela emzini yabo okungekho emthethweni.
“Abantu abathengisa emzini (amashabhini ekhaya) lokhu angikuvumeli esigabeni sami. Labo abakwenzayo ngiyahle ngibaxotshe esigabeni beyedinga indawo lapho okuvunyelwa khona lawo mashabhini,” kubika uMathema
Ugatsha lwe Hatshi esigabeni sami lwasungulwa yi Young People’s Network on Health and Wellbeing (YPNHW) esebenza ixhasane logatsha lwe National AIDS Council (NAC) kuhloswe ukuvikela ukuthi abantwana bengendi bebancane njalo bengamitshiswa bebancane. Kulumhlubulo abazali babika ukuba intshengu liqhuqhuzela lezi zehlakalo.
