BY MTHULISI NYATHI
COMMUNITY REPORTER
ABADLALI begunqu njalo abasakhulayo abeqembu leManama Hotspurs FC eseManama Business Centre bayakhala nge lockdown bethi ibaphambanisela ikusasa labo.
Intsha leyi ithi lokhu kubabisela emuva kakhulu kumdlalo wabo njalo ibhola belibalibazisa kakhulu osokwenze ukuswelakala kwalo kwenza abanye bedanele ezidakamizweni.
Omunye umdlali owadlalela leliqembu kodwa okwamanje usedlalela iJessie Mine, uSiko Ncube, uthe ukuvalwa kwezemidlalo kubisela iqembu emuva ngoba belikhangelele ukungena emncintiswaneni lamaqembu akwanye amadolobho.
Ucele ukuba uhulumende avumele imidlalo idlalwe lapho belandela izixwayiso ezibhakene leCovid-19.
Ukaputeni waleli qembu uUMthokozisi Maguire Moyo ukhuthaze abadlali ukuba bayehlatshwa amajekiseni okuvikela iCovid-19 njalo wathi njengabatsha bazazama ukukhuthaza abanye ukuba bayehlaba.
Umdlali omkhulu waleli qembu uPolite uthe yena ilockdown leyi ibabisela emuva ngoba njengabatsha baziphilisa ngama piece job manje kathesi kunzima kanye lakuqembu labo leHotspurs.
Intsha yaleliqembu ithi yona aluba bayavunyelwa bazilolonge nje ukuze bengaphelelwa yikusasa labo.
Umqeqetshi waleli qembu uMpumelelo Mathema uthe kuyamkhuba ukuba mihla lamalanga ubone abafana abalesipho bephelelwa likusasa elihle.
