22 Lwezi 2024
Ngu Mpokiseng Sibanda lo Artwell Sihwa
GWANDA SOUTH -Abahlali bakaward 2,8,12,15,16,24 ngaphansi kwenduna uMarupi bazancediswa ngokudla okwakha imizimba kanye lezimuli zabo ngemva kokuba inhlanganiso yeWorld Vision ixhasane leSocial welfare ekubhaliseni amabizo alabo abazathola usizo.
Usizo lolu lubuya ngesikhathi esifaneleyo lapho ilizwe likhangelane lomashaya bhuqe wendlala kubangelwa yikungani kuhle kwezulu iminyaka emibili edlulileyo (Elnino-Induced drought). Isomiso lesi silethe ubunzima phakathi kwabantu Kanye lezifuyo ngoba kuswelakala ukudla okwanelayo.
Okhokhela inhlanganiso ye World Vision uBanele Masina uxwayise umphakathi ukuthi ubhalise ngeqiniso lokuletha izifundo ngokugcweleyo.
“Uhlelo lukhangele ukuncedisa izimuli eziswela ukudla okwaneleyo ngesikhathi sesomiso ukuze zisizakale ngokudla okulomsoco njalo lokwakha umzimba lokunanzelela abantwana labomama ezimulini,” kusitsho umnunzana uMasina.
Obemele ugatsha lweSocial Welfare uAlia Mafunde uthe iWorld Vision izakuba khona okwesikhatshana esifitshana andubana igqibe uhlelo lolu.
“IWorld Vision izancedisa abantu okwenyanga ezintathu kuphela uMfumfu, Lwezi loMpalakazi incedisa iziqinti eziyisithupha kuphela. Lokhu kusitsho ukuthi lapho okuncedise khona iWorld Vision inhlanganiso yeSocial Welfare ayisaphathisi okwenyanga zonezo,” kusitsho unkosazana Mafunde.
Uqhubeke eveza isilinganiso sokudla esizemukelwa ngabazathola ukudla lokhu.
“Abadala bakhangelelwe ukuthi bathole amafutha(750ml), indumba(1kg-1,5kg) kanye lempuphu(10kg) ukuze badle njalo lokhu kukhangelelwe ukuthi kube ngokwesilinganiso samadola alitshumi lambili($12) emelikha, ngomuntu munye.”
Omunye wabazahola ongazange athande ukuziveza ngebizo uthe ngabe loluhlelo lugoqela umuntu wonke ngoba indlala ihlasela wonke umuntu.
“Ngabe lolu hlelo luyathatha imizi yonke ukuze senelise ukudla ndawonye ngoba kunzima ukuthi ngidle umakhelwane labantwana bengadlanga ngoba lesi somiso sendlala sinzima okwenza sesabe ukupheka esilakho loba ukuthenga impuphu kukhanya emini ngezizatho ezithile kanye lalobu bugelekeqe osobugcwele indawo yonke”.
U Alexanda Mahla usobhuku weSelonga uthe uhlelo lolu luqhutshwa kuhle ngoba belandelela ukuthi abantu babhalisa iqiniso yini.
“Ubuhle balolu hello yikuthi bayandelela iqiniso kunani labantu abasemagumeni ngoba abantu abanengi bebebhalisa okungayisikho okubangela ukuthi abantu abathile basilele,ngokunjalo sifisa ukuthi ixekana eliyabe lisele lithole usizo ukuze kungabi lobugebenga ebantwini uzulu ahlalisane ngokuthula”, kusitsho umnu Mahla.
UEmmanuel Makhabane Ndlovu ongukhansila ubonge kakhulu uhlelo lolu ngoba lugoqele leward yakhe.
“Ngamafitshane kusiphathe kahle kakhulu ukuba ngeyinye yamaward akhethiweyo kuzasiqhuba siphutshe umnyaka ngoba isimo sendlala besisibi,ukulungisiswa kwenani labantwana kube liqhinga elihle ngoba kwenze ukuthi labekade bengaholi bathole ithuba lokubhalwa ukuze bahole,” kusitsho ucllr Ndlovu.
UMongameli weZimbabwe uEmmerson Mnangagwa wabika ukuthi isomiso lesi ngesezinga eliphezulu esiyingozi elizweni njalo kudingakala usizo lokuthi ilizwe lincediswe ngokudla okwenelayo (declared drought as a national disaster).
> 𝑵𝒕𝒆𝒑𝒆-𝑴𝒂𝒏𝒂𝒎𝒂𝑭𝑴
𝗗𝗶𝗱𝗬𝗼𝘂𝗞𝗻𝗼𝘄 it pays to advertise with Ntepe-Manama Community Radio. You can contact us on the following details.
𝗖𝗮𝗹𝗹𝘀:0772462909.
𝗪𝗵𝗮𝘁𝘀𝗔𝗽𝗽 0779308003 𝗲𝗺𝗮𝗶𝗹:ntepemanama@gmail.com.
Follow the Ntepe-Manama Community Radio 97.0 channel on WhatsApp: https://whatsapp.com/channel/0029Vab45XdKGGGD1NN4iL3S
Come Advertise With Us.
