06 Zibandlela 2025
Ngu Liberty Mutamba
Gwanda- Umdlalo kano bhutshuzwayo ozadlalwa ePhelandaba stadium uzaqala ngezinga eliphezulu langesivutha, nanko ke iMorgan Foundation izaqhuba inkezo ye TMF kumpelaviki ebuyayo.
Amaqembu amane akhangelwe ukuthi angene kulu mqudelwano atshengise ubungcitshi bawo. IAjax Hotspurs FC (Bulawayo), Jordan FC (Felabusi), Gwanda Pirates le Superstrikers ezase Gwanda, zizadlala kulu mqhudelwano.
Inkezo le iqhutshwa yisizalwane se Gwanda, uMorgan Milton Nare ongu mqeqetshi We Northerns FC kwele South Africa.
UNare uthi uletha umncintiswano wenkezo eGwanda ukuzo phakamisa isipho sebhola eGwanda njalo anikeze abadlali igunya loku qhudelana lamanye amaqembu.
“Inkezo izabakhona Ngo Mgqibelo, mhlaka 11 Zibandlela ePhelandaba Stadium. Amaqembu esiwamemileyo asekubeke mgceke ukuba azabuya. Njengomuntu okhulele eGwanda ngifisa ukuthuthukisa abadlali bakulumango njalo ukubambanisa amaqembu anjenge Ajax le Jordan yikuthi sitshengise ukuba enkundleni kulokubambana njalo nxa sithuthuka, sithuthuke sonke,” kusitsho uNare.
Ubike ukuthi selesikhathi efisa ukuthi umncintiswano ofana lalowu wenzeke ngakho ke iphupho lakhe lizafezeka.
“Inkezo le sengileminyaka ngiyilokothela ukubona isisondela kuyangi jabulisa ngoba ngifisa ukuba sithuthuke njalo sibone abadlali beqinile. Amaqembu lawa asakhulayo asekhiphe abantu bakithi kuzidakamizwa okuyinto enhle,”.
UNare olencence le CAF njalo wayenza iDiploma le Sport and Recreation Management uthe obengumdlali omkhulu uKudakwashe Mahachi uzabe ekhona kulumqhudelwano.
“Simeme uMahachi ukuthi abadlali bathole intshukuntshu yokuthi labo badlale beqinile njalo bengadlalisi isipho abalaso. Inkezo le ngeyakuqala lapha eGwanda sifisa ukuba idlondlobale ukuze abantu emaJahundeni bathole labo unanzo ikakhulu kwezemidlalo,” kutsho uNare.
Abantu eGwanda sebeqalile ukunathisa itiye ngalo mqudelwano. Unompembe olesizotha uNkosana Nduna nguye ozatshaya impembe kulinkezo.
Umdlalo ukhangelelwe ukuqala ekuseni ngo 10 ekuseni lapho i Superstrikers izadibana le Jordan FC besekulandela iGwanda Pirates le Ajax.
> 𝑵𝒕𝒆𝒑𝒆-𝑴𝒂𝒏𝒂𝒎𝒂𝑭𝑴
𝗗𝗶𝗱𝗬𝗼𝘂𝗞𝗻𝗼𝘄 it pays to advertise with Ntepe-Manama Community Radio. You can contact us on the following details.
𝗖𝗮𝗹𝗹𝘀:0772462909.
𝗪𝗵𝗮𝘁𝘀𝗔𝗽𝗽 0779308003 𝗲𝗺𝗮𝗶𝗹:ntepemanama@gmail.com.
Follow the Ntepe-Manama Community Radio 97.0 Group on WhatsApp: https://chat.whatsapp.com/FM9CMb7F1K83o8KDR5Z0LX
Come Advertise With Us.
