24 Zibandlela 2025
Ngu Liberty Mutamba
Konke sekulungile ukuba kuqhutshwe umdlalo ka msekeli welizwe uVice President (VP) Kembo Campbell Mohadi, ozadlalwa kusasa lange Sonto (25-26 Jan) enkundleni yePhelandaba, edolobheni lase Gwanda.
Umdlalo lo ugoqela ibhola lokuqaga lelika nobhutshuzwayo. Amaqembu alitshumi lambili azabe ebanga leyo nkezo, amaqembu la, avela kuma Constituency (12) angeZansi yemaNdebeleni.
Okhangele intuthuko, ingqubekela phambili eZansi yemaNdebeleni uHon Dr Evelyn Ndlovu uthi umdlalo lo, ujonge ukulimukisa intsha ukuba ingathathi izidakamizwa.
“Konke sekulungile ukuba umdlalo lo uqhutshwe lapha eGwanda. Injongo yalumdlalo yikuthi sibone ukuthi abasakhulayo abahlali ezitolo, bethatha okudakayo. Sifisa njalo ukuthi sibone abasakhulayo bengena kwezemidlalo ukuze balolonge amathalenta abo, lokhu sekungabavulela amathuba omsebenzi,” kusitsho uHon Dr Ndlovu.
UHon Dr Ndlovu ugcizelele esithi intsha kumele bazwisise uhambo lukamsekeli welizwe uVP Mohadi, njalo labo bazizwe belomlandu wokugcina, lokuvikela ilizwe.
“UVP Mohadi wahamba ukuyalwela ilizwe emncane wabotshwa, wadlula entweni ezinengi kodwa waqinisela esilwa, labanye bakhe ukuba sithole uzibuse. Laloba impi isiphelile lokhe esebenza ngokuzikhandla ukuba ilizwe lithuthuke. Lokhu sifisa abasakhulayo bakuzwisise njalo labo bazibone belomlandu wokugcina, lokuvikela ilizwe lakithi. Abasakhulayo kumele babone ukuba sathola uzibuse kanzima njalo kumele bakuvikele lokho. Thina njenge Matabeleland South sibone kuqakathekile ukuthi simenzele umdlalo lo uVP Mohadi,” kutsho uHon Ndlovu.
UVP Mohadi ukhangelelwe ukuthi uzabuka lumdlalo ngeSonto.> 𝑵𝒕𝒆𝒑𝒆-𝑴𝒂𝒏𝒂𝒎𝒂𝑭𝑴
