12 Nhlolanja 2025
Ngu Milton Mashasha
PELELE-Abalimi besivandeni sePelele Mlenje kuWard 12 sebelethemba ukuba bayathola isivuno esihle emunjini abawuhlanyelayo kuleso sivande enyangeni ezedlule. Umumbu lo ususebangeni lokukhahlela kukanti omunye lawo ususeduze lokukhahlela ngoba bawutshiyanisa ngamaviki ambalwa ukuze uvuthwe ngokutshiyana.
Umgcinisihlalo wesivandeni sePelele Mlenje unkosikazi Silindeni Gumbi ubikele umsakazo kazulu ukuba sekuthembisa esivandeni sebezathola isivuno esihle bathole lokudla okweneleyo.
“Sihlanyele lumumbu kuzigaba ezimbili owokuqala usukhahlela kukanti omunye lawo ngamaviki alandelayo uyabe usukhahlela, safaka umumbu lowu masinyane sisenzela ukuthi siwuvune singakadli ihlobo emasimini, sikhangele ukuthola isivuno esihle sibili lapho esizathola owokudla lemuli njalo silakho njalo ukuthengisela izakhamizi ukuze senelise ukuthenga ezinye indingeko zangekhaya “
” Sahlanyela njalo lembambayila sinanzelela ukuthi kusiyafika isikhathi somqando iyabe isilungele ukuvunwa njalo iyaphangisa ukuletha inzuzo ngoba iyathengwa kakhulu”, kubika uNkosikazi Gumbi.
UMiriam Nkomo ongomunye wabalimi bakuleso sivande ubike ukuba bananzelela ukuthi ukufaka umumbu ngalesisikhathi sezulu kungumqondo omuhle njalo kuzabanika isivuno esihle.
“Sinanzelele ukuba ukuhlanyela umumbu ngalesisikhathi sezulu kungumbono omuhle ngoba lapha sisebenzisa uhlobo lokuthothisela (drip) yikho yona yodwa iyasilela ukuthi izilimo zithole amanzi ayeneleyo yikho nxa kuhlangene lezulu kuba ngcono kakhulu ngoba njalo nxa sikhangela imbambayila ifuna amanzi amanengi sicina sisebenzisa imigqomo ukuze amanzi enele kuzilimo zethu, ” kutsho uNkosikazi Nkomo.
UKeabetsoe Ndlovu ubike ukuba bayaqina ngokulima kulesosivande ngoba balabazukulu afuna ukudla lendleko zesikolo.
“Silabazukulu abafuna ukudla lokufunda yikho lokhu kuyasincendisa ngoba siyathola ukudla kanye lemali ngemva kokuthengisa njalo kuyasiphathisa abantwaneni ngendleko zesikolo,” kubika uNdlovu.
Exoxa lomsakazo kazulu uSithabile Khumalo ubike ukuba njengabomama isivande lesi siyancendisa kakhulu ukuze bathole imali eziqondane labo njengabomama
” Asisameleli ukucela imali kubobaba ikakhulu ezokuthenga isawudo lokunye okwangekhaya ngoba imali siyayizuza ngemva kokuvuna lokuthengisa, njalo eyinye sithenga ngayo imithi yembuzi ngoba nanko sileproject yembuzi,” kulandisa uNkosikazi Khumalo.
Omama bakhuthazwa ukuba bangahlaleli izandla baphatheke kunhlelo ezibaphathisa ukuba bathole imali eziqondane labo.
@ lesego.
