17 July 2025
Ngu Jonah B Moyo
Iqembu leManama F.C lithi usuku lwangeSonto selubaphuzele ukuba banqobe iqembu le Delete FC kumdlalo we Matabeleland South Division 2.
IManama ifuna ukukhipha isinyama sokunganqobi ekhaya. Lokhu bangena kuligi le sebanqoba kanye ekhaya bedlala le Spitzkop stars.
ISpitzkop Stars yasala itshe amathe ngemva kokuba beyinqobe 4 lika 3.
Ngemva kwalapho abazange basanqoba besekhaya. Bakhangelele ukuqamula amaketane abenza benganqobi besekhaya phambili kwabakibo.
Iqembu lilamaphuzu alitshumi lasitshiyagalombili (18) ngemva kokudlala imidlalo elitshumi.
Umqeqetshi weqembu leManama F.C uMnu Mluleki Sibanda uthe ngesonto bazayibonisa intuthu iDelete F.C.
“Sesilesikhathi singanqobi sidlalela ekhanya lokhu sekuyenza amanye amaqembu esidelele uma bezodlala lathi ekhaya enkundleni yeManama High. Lokhu kusenze satshonisa ikhuba ebafananeni bethu, sangezelela amalanga okulolonga ukuze beqine bengekethisi emidlalweni elandelayo,” kutsho uSibanda.
Ungezelele wathi sebatshintsha lendlela yokudlala
“Sabona amaphutha esasiwayenza emidlalweni edlulileyo lokhu kwafuqa ukuthi sibonisane njengeqembu ukuthi singenzani ukuze iqembu lethu liqine ukuze umdlalo obuyayo ngesonto sikwanise ukuthi kube yisibonelo sokuthi Utshaka katshayeki, yikho sesitshintshe lendlela yokudla,” kutsho uMqeqetshi.
“Abafana sebewufuna lowu mdlalo isonto isibaphuzela ngoba abalandeli bethu sebelindile ngamehlo abomvu ukubona sinqoba ekhaya ukuze bengapheli ithemba lokubuya bezosisekela lapha ekhaya ngobunengi,” kutsho uSibanda.
Imidlalo yeDivision 2 yalimpelaviki imi kanje.
Week 12
Pool A fixtures
Saturday
Mawabeni vs Boys emaMawabeni 3pm
Spitskop vs Habane pirates eJM Poly 3pm
Sunday
Manama FC vs Delete eManama High 3pm
Super strikers vs Gwanda stars eJM Poly 3pm
Supersport vs Jessie eSt Christophers 3pm
West Academy vs Unicem eWest Nich 3pm
Blanket vs Vhembe stars eLong John 3pm
