25 Lwezi 2025
Ngu Liberty Mutamba
Abaqoqa iMayor’s Cheer fund babika ukuba amalungiselelo asesezingeni eliphezulu, lonyaka umcimbi, uzaqhutshelwa eMount Cazalet Lodge.
Umcimbi lo, osuyinhlalayenza uzabakhona ngoLwesine Lwezi 27. Lonyaka kukhangelelwe ukuqogelela imali engange USD$ 10 000.
Umcimbi lo uyabe ungowokuqogelela imali, ukudla, impahla, izipho ezizancedisa umphakathi weGwanda. Phambilini bekuncediswa abantwana besikolo ogogo labo khulu, abasedolobheni leGwanda.
Umgcinisihlalo we Gwanda Mayor’ cheerfund uMethusi Moyo uthe lonyaka bakhangelele ukuthola inzuzo ethe xaxa ukuze benelise ukwelula isandla ebantwini abanengi.
“Sikhangelele ukuthi sithole izandla ezilula ukuze senelise ukunceda inani labantu abanengi lonyaka. Phambilini besincedisa abafundi abambalwa ukuba bhadelela imali zesikolo, ukuncedisa ogogo labo khulu abahlala edolobheni lethu. Sifisa ukuba osomabhizimusi, amaJahunda, abemba ilitshe eligugu abalimi besixhase kuhambo lwethu,” kubika uMoyo.
Abantu bazayabelwa impahla lezi, ukuze bethole ikhisimusi elifana lelomuntu wonke. Umcimbi lo uhlose ukuncedisa abantu abaswelayo labangela mandla okuzincedisa.
Usodolobho we Gwanda uThulani Moyo uthe umncimbi lo ukhangelelwe ukuncedisa abantu abadlula amakhulu amabili.
“Sifisa ukuncedisa abantu abadlula amkhulu amabili, okhulu labo gogo abahlala eOld People’s Home, abantwana besikolo. ICommitte izaxhasana lengatsha ezikhangele abantu abampofu lomphakathi weGwanda ukuze impahla lezi ziyebantwini abaqondileyo.
“Sikhangelele ukuqogelela imali efika USD $10 000. Imali le, izayenza umahluko edolobheni lethu asifuni kutshiya abanye ngemuva,”kubika uMoyo.
Kusenjalo kuzaqhutshwa njalo iMayor’s Annual Boxing Tournament mhlaka 29 Lwezi lapho okuyabe kulimukiswa intsha ukuba itshiye izidakamizwa njalo kuhlanzwe, idolobho lama Jahunda.
Umdlalo wenqindi eGwanda usinike abatsha igunya lokuthi baphakamikise ibizo leGwanda, nanko phela abanye sebetshaya inqindi kumidlalo esezingeni eliphezulu.
Umdlalo we nqindi uzaqhutshelwa enkundleni ye Phelandaba ngaphansi kwendikimba ethi, ‘Knock out drugs, knock out litter’.
