30 Zibandlela 2026
Ngu Liberty Mutamba
USipho Ndlovu (akusobizolakhe) 5yrs engakatholi uncedo ngempahla zesikolo.
USipho Ndlovu (akusobizolakhe) 5yrs ube eyindlubu ewele ephokweni kubosowabo nanko phela ubelokhu egqoka impahla zekhisimusi esikolo, lokhu bekudalwa yiminwe emfitshane yangekhaya.
Umntwana lo, olejwabu elimhlophe bekungamhlabusi ukuya esikolo seMapate Primary ngalezo mpahla. Konke lokhu sekuzaba yimbali ngemva kokuba athengelwe impahla zesikolo, ukudla, ingwalo, lokubhadalelwa indleko zesikolo ngomunye umama odabuka kulowo mango.
Abafundi bavame ukunanzwa ngempahla zesikolo kodwa esakhe isimo besehlukile ngoba engelazo lezo mpahla zesikolo. Ubephuma egqoke ezangekhaya esuka koRamnoana elubhekise eMapate Primary.
USaviour Maphosa (NaPrayer) ukhethe ukuncedisa umntwana lo, ufeze amaphupho akhe ngokumthengela impahla zesikolo, ukubhadala indleko zesikolo, ukudla lokunye okungamncedisa esikolo.
“Mina ngakhula ngincediswa esikolo. Ingakho lami sengihlose ukuncedisa abanye abantu ikakhulu abantwana abadinga uncedo. Ngakhuluma lenhlanganiso yeNkomwa Foundation Trust yiyo eyangihlanganisa lomngane wami lo. Ngiyathaba ukuba ngincedisa umntwana wakithi lapha koRamnoana.
“Ukuncedisa abanye ngibona kuyisiphiwo engazalwa ngisifumbuthe. Ngincedisa umntwana wasekhaya ngoba akula muntu ozasuka phandle kwelizwe ezoncedisa abantu bakithi. Ngokuncane engikutholayo ngoba ngikwabela abanye, ngifisa ukuthi abantu abaphandle besithole sincedisana hatshi ukuthi sihlezi silinde bona,” kubika uMaphosa.
Umama womntwana uNelia Munhundarimi-Siziba uveze ukujabula esithi yena ubezama ngendlela zonke kodwa kumkhama.
“Ukukhulisa umntwana ole jwabu elimhlophe kunzima, ngoba indingeko zakhe zinengi. Bekungizwisa ubuhlungu ukumhambisa esikolo eqgoke impahla zangekhaya. Ukumbona segqoke impahla zesikolo kuyangijabulisa. Ngikhulekela ukuthi isipho lesi singapheleleli kimi kuphela. Sengilethemba ukuba sezafunda ekhululekile kubangane bakhe. Izandla zedlula ikhanda, njalo ngithabe kakhulu,” kubika uSiziba.
Umntwana lo, olejwabu elimhlophe wananzwa yinhlanganiso yeNkomwa Foundation Trust ekhangela ngabantu abakhubazekileyo. Sixoxe loMonitor Beloved Ncube osabambe isihlalo sokuba ngumqondisi walinhlanganiso.
“Sifisa ukuba abantu abakhubazekileyo bethole indlela zokuzithuthukisa. Siyenelisa ukubaxhumanisa labantu abangaba siza lapha lalaphana. Njengenhlanganiso sihalalisela umntwana wethu osethole umama ozamncedisa esikolo. Sezafunda ekhululekile.
“Inhlanganiso yethu ikhangela inhlalakahle yabantu abakhubazekileyo. Sikhangele kakhulu ukuba bengabandlululwa njalo benikwe amathuba afana lawomuntu wonke esigabeni,” kutsho uNcube.
