Ngu Jonah B Moyo
Kubotshwa uGogo(63) weMatshetsheni ngemva kokusolelwa ukuthi ubulele umkakhe obeleminyaka engamatshumi ayisikhombisa(70) ngokumgamula ngehloka ekhanda.
Umsolwa uMariam Ndlovu ugamule uHarold Ngwenya kabili ngehloka ekhanda lapho emkhuza ukuthi angatshayi izalizelwe lakhe.
Osabambe iskhundla sokuba yisikhulumeli samapholisa eZansi yemaNdebeleni uAssistant Inspector Stanford Mguni ubike ukuthi lesi siga senzakele mhlaka 11 Ncwabakazi ntambama.
“Mhlaka 11 Ncwabakazi 2026 uHarold Ngwenya osedlulile emhlabeni wayesekhaya lakhe lonkosikazi wakhe (umsolwa) lo nkosazana uHappiness Ndlovu(Step Daughter), lapho umufi owaqala ukuhluphana loHappiness ocine esevusa umlilo omkhulu ngokubiza uNgwenya(Step Father) ngokuthi ungumthakathi.
“UNgwenya wahle wadla amalahle watshaya uHappiness phezu kwelihlo langenxele ngengamuva kwehloka, umsolwa wabamba uNgwenya balwisana ukuze ame ukutshaya umtanakhe. Lapho besalwisana ugogo wasekhulela ukhulu ngamandla wasemthathela ihloka wahle wamgamula kabili ekhanda uNgwenya wawela phansi kwahle kwaba yikudlula kwakhe emhlabeni,” kubika uAssistant Inspector Mguni.
Kuthe sekuyenzeke isiga lesi, yikho sekubikelwa amapholisa kwahle kwabotshwa umsolwa uMiriam Ndlovu(63).
UAssistant Insp Mguni ubika ukuba isidumbu sika Ngwenya sathwalelwe eGwanda Provincial Hospital Mortuary.
“Umsolwa usebotshiwe njalo sisayenza uphenyo mayelana lodaba lolu. Sithanda ukukhuthaza uzulu ukuthi ame ukuphatheka ezintweni zobudlwangudlwangu. Sikhuthaza njalo uzulu ukuthi atshiye ukuhamba ethwele izikhali eziyingozi ngoba yizo ezicina zidala ukuthi umuntu azithole seyenze icala,” kutsho uMguni.
