Ngu Liberty Mutamba
MPANDE– Abantu bazathakazalela isiko lamaVenda, Shangani, Sotho ngaphansi komcimbi we Tshitaudze Heritage Festival ozaqhutshwa kusukela 25 kusiya ku 27 Mpandula, eTshitaudze Cultural Village, Mpande Beitbridge.
UMongameli weziNduna iNduna uMtshane Khumalo nguye okhangelelwe ukuba ngumhlonitshwa omkhulu walumkhosi.
Umcimbi lo, uzabe usungulwa lonyaka uhlose ukubumbanisa indimi ezitshiyeneyo njalo kuvuselelwa kwamasiko. Amalungiselelo ahamba ngendlela nanko phela sekufakwe lezakhiwo ezitshiyeneyo ezithwele indimi ezitshiyeneyo.
Loba amaVenda kuyiwo ayabe ethwele lumcimbi, bayelule isandla kwezinye indimi ukuthi zitshengise isiko labo okutshengisa ukubambana kwabantu abaNsundu.
Kuzabe kulemidlalo yenguqu kuthi abathanda amachacho lezigingci labo bazathola ithuba lokugiya. Osomabhizimusi, abalobi besiVenda, abahayayo kanye labafisa ukuthengisa labo bazabe bebukisa abakwenzayo kulumkhosi.
Abahlabeleli bathembisa uzulu ukuthi kuzabe kungu mcimbi omkhulu ozatshengisa ukuqakatheka kwesiko. Izakhamizi zakulowo mango zimatasa ukulungiselela lumcimbi omkhulu.
Abantu abavela kwele South Africa sebethembise ukuthi bazaphatheka kulumdlalo. Phambilini iNduna Tshitaudze ikhuphe amazwi okuba umdlalo, lo uhlose ukuphakamisa usiko, lokunika abantu abeleziphiwo ithuba lokuziveza.
“Siyabe sithakazelela usiko lwethu njengama Venda, sibone ukuthi isigaba se Zansi yemaNdebeleni silendimi ezitshiyeneyo yikho senze imikulu yama Shangani, Sotho ngoba labo bayatholakala kulindawo. Kuzaba lithuba elikhulu kubahlabeleli bakithi ngoba bazathola isikhathi sokuthi babonwe nguzulu njalo beveze iziphiwo zabo,” kutsho iNduna uTshitaudze.
Isitsha sokuphosela izipho sivuliwe kubantu abafisa ukuphumelelisa lumcimbi, kuyabe kungathakazelelwa isiko kuphela abantu bazathola ithuba lokwazana okuvula amathuba okuthuthukisana, lokubambisana.
Ukuze isiko lingatshabalali abafundi abadabuka kuzikolo ezifika amatshumi amathathu anxusiwe ukuthi azoba yingxenye yalumkhosi. Kuzabe kuphekwa ukudla kwesintu, kutshengiswa izigqoko ezithwele isintu.
