Ngu Liberty Mutamba
Sebephila ngemisebenzi yezandla abatsha beluka amangqonqo/ubuhlalu kwelezansi yamaNdebeleni, ukuze bazivulele amathuba emisebenzini, njalo bezikhiphe kuzidakamizwa.
IBeadwork ngumsebenzi wezandla odabuka esintwini lapho abantu bayebe beluka amangqonqo ukuze benze amacici, inecklace, izikhwama lokunye nje okwemiceco.
Ukuluka amangqongqo ngomunye yemisebenzi eyayidumile endulo, njalo isenziwa kugxilwe emasikweni abantu abansundu, lumsebenzi ubusenziwa ngabantu besifazana. Kulesikhathi labantu besilisa sebesenza lowo msebenzi, njalo usuvamile kulezinsuku.
Ngempelaviki, iMagie Unique Designs ixhasane le Emsamo Wakwethu Association iqoqe intsha kwelezansi yamaNdebeleni, bathi gwaqa eNational Arts Council of Zimbabwe (NACZ) edolobheni lase Gwanda befundiswa ukweluka amangqongqo, ukuze bazivulele amathuba emisebenzi.
Umqondisi we Magie UniqueDesigns njalo engumqeqetshi ku Beadwork uMaginess Ndlovu uthi wasungula leyinhlanganiso ukuba ancedise abatsha ukuba bazi imvelaphi yabo.
“Singakhangela intsha yalezinsuku isigqoka izigqoko ezitshiya imizimba iphandle, lokhu kutshengisa ukuthi isiko lethu selitshabalala kancane. Ukuluka amangqonqo sifundisa itsha ukuba ibelolwazi lwemvelaphi. Kuliphupho lami ukuba abasakhulayo basebenzise izandla zabo ukuze bazithuthukise ngaphansi kwe Beadwork ukuze bazivulele amathuba emisebenzi,” kutsho uNdlovu.
UNdlovu watshengisa ubungcitshi bakhe kubeadwork eMalawi Trade Fair ngo Ncwabakazi lapho aluka iflag ye sizwe ngama ngqongqo. UNdlovu uthi uncedisa abasakhulayo ukuze benelise ukubalekela izidakamizwa.
“Silapha siyaba fundisa ukuze babe lama certificate okuthunga ubuhlalu ngezandla zabo, lokhu kuzayenza intsha iphume kwezidakayo,” kutsho uNdlovu.
Umqondisi we Emsamo Wakwethu Association uSikhululekile Sibanda uthi inhlanganiso le yavulwa ukuze abantu abangomama benelise ukusebenzisa izandla zabo ukudinga imali.
“Sananzelela ukuthi ukuhlala sicela imali kubo baba nsukuzonke kwenza omama bebe ngamavila. Lokhu yindlela elula eyenza omama benelise ukuzimela, njalo iyancedisa ukulwisa ukuhlukuluzwa kwabo mama ezindlini(GBV). Ngikhuthaza omama ikakhulu lentsha ukuba bazivulele imisebenzi besenzisa iBeadwork, njalo belondoloze isiko,” kutsho uSibanda.
Umsakazo kazulu uxhumane lo Witness Ngwenya (27) we Matopo othi yena ukweluka amangqongqo kuzamphathisa empilweni yakhe.
“Kuvamile ukuba abantu besilisa behlehlele emuva kumisebenzi enjee, mina ngifuna ukutshengisa uzulu ukuba akusela msebenzi osakhetha ubulili. Ukweluka lokhu kuzangiphilisa njalo akuso msebenzi onzima, ufundeka kalula,” kusitsho uNgwenya.
UPamela Maduma (25) uthi ukufunda ukweluka lokhu ngumsebenzi ozamenza enelise ukuzimela njengomuntu wesintwana.
“Bengihlala ngibona abantu begqoke amacici lama bracelet ngicabanga ukuthi kwenziwa phetsheya ngingazi ukuba lami ngizenenlisa ukukwenza. Namhla sengilendawo ezangilethela imali yokuba ngizithuthukise,” kutsho uMaduma.
UMthandazo Ndlovu(22) omunye wabaqheqhetshisi uthi yena seyenelisa ukufundisa njalo seziphilisa ngalumsebenzi.
“Angisitholi sizungu, njalo angilali ngingadlanga.Namhla lami sengenilisa ukuncedisa abanye ukuba beluke amangqongqo njalo lokhu ngikhula ngisiya phambili ngalumsebenzi. Akukho nzima ukufunda iBeadwork kuyango kuzimisela komuntu,” kutsho uNdlovu.
INational Arts Council of Zimbabwe (NACZ) ekhokhelwa ngu Percy Vela emhlubulwemi wangeZansi yemaNdebeleni uthi linhlanganiso isebenza ngamandla ukuba abantu bathole indawo yokuthengisela imisebenzi yabo.
“Imisebenzi yezandla le ithandwa ngabantu kakhulu, ingakho njenge NACZ sigqugquzela ukuba batshengise imisebenzi yabo kuma Trade Fair, Busines Expo, Seminar, lezinye indawo lapho abantu ababuthana khona. Kulesitimela seRovos bavame ukuthengisela abantu abagada leso sitimela. Sikhuthaza abantu abatsha ukuba bayenze imisebenzi efana laleyi ukuba baphume kuzidakamizwa,” kutsho uVela.
