Zibandlela 22, 2024.
Ngu Jonah B Moyo.
Inhlanganiso ezimele yodwa, iBrethren in Christ Compassionate and Development Services isimanyane lentsha lezakhamizi zika ward 16 kwele Gwanda South, kuhlelo lokulwisana lokutshintsha komkhathi (iclimate-change).
Inhlanganiso le izophendula isililo sokuswekala kwamanzi njalo loku tshintsha komkhathi. Utshintsho lomkhathi seludale ukutshisa ikakhulu ezansi yemaNdebeleni kanye lomhlaba wonke jikelele.
Abakhokheli balinhlanganiso bathi bazimisele ukuletha inhlelo ezitshiyeneyo, ezizaphathisa abahlali bakulowo mango ukuba balwisane lalokhu kutshisa.
UGugulethu Nyathi onguproject officer wenhlanganiso le uthi bazaletha inhlelo ezitshiyeneyo esigabeni sikaWard 16 ukuze baphathise izakhamizi.
“Inhlelo zethu zigoqela, ukufuya inkukhu makhaya, ukufuya inyosi, ukulima, ukuvuselela amadamu asegqibelekile, ukuvuselela izikotsho ezingasasebenziyo, ukuvala imigelo esezindleleni, lesezikolo njalo loku gola amacimbi.”
“Njengoba sesingaphansi ku (climate change) sibone kungcono ukuthi silethe inhlelo ezinjengalezi ku ward 16 ukuze abantu bekwanise ukuziphilisa njalo inhlelo lezi kazikhethi muntu abatsha labadala bayangena,” kutsho u Nyathi.
Bathabe bamanzi nte, abafuyi besizwa ukuthi kuzavuselelwa amadamu lezikotsho ukuze agcine amanzi ezifuyo, labantu baphumule ukuhamba umango omude bedinga amanzi.
Basukumele phezulu abatsha labadala belanda umhlangano lowu. Abenelise ukuxoxisana lomsakazo kazulu batshengise ukuthokoza besizwa inhlelo lezi.
UXeshelihle Masina (24) ovela esigabeni seMbizo uthi intsha izimisele ukusebenzisina lenhlanganiso ye Brethren in Christ Compassionate and Development Services ukuthuthukisa indawo yakwabo.
“Siyajabula njengabantu abatsha ukuzwa inhlelo ezigoqela lathi ngoba zizasifundisa ukuthi sikhule sikwanisa ukuzisebenzela. Ontanga bami sebezaphuma kuzidakamizwa ngoba siyabe sesilento yokwenza lathi ngoba uhlelo olunjengokufuya inyosi alufuni usebenza wedwa kumele libe libambisana,”kutsho uMasina.
UTemuso Nare uthe njengabantu abadala bakhalela amanzi azagcina izifuyo zabo.
“Inhlelo eziphathisa izifuyo zethu siyazi thakazelela. Thina singabantu bokufuya lokulima sizenelisa ukuphilisa imuli zethu. Sigqugquzela ukuba baqale bebambe indaba yamanzi ngoba eMapate(Ramonoana Line) asila manzi, asila sikotsho.
Sivame ukudinga amanzi eTuli njalo kungumango (5KM). Kungavuzeselelwa isikotsho sizaphumula ukuhamba umango sidinga amanzi,” kutsho uNare
UKhansila kaWard 16 eGwanda South uMnu. Holokile Matjaka uthi abe Brethren in Christ Compassionate and Development Services bazancedisa abatsha ukuba batshiye izidakamizwa njalo bethuthukise indawo yabo.
“Abenhlanganiso leyi babuye bephendula udubo lwamanzi esilalo lapha ekhaya lethu. Bekhangele lokutshintsha komkhathi, njalo beletha inhlelo zokulima ukuze bephakamise impilo yabantu bakithi”
“Ekuvuselelweni kwamadamu inhlanganiso ithe izabuya labantu bayo omanjinela abakhangela ngamadamu. Eminye imisebenzi kuzaqhatshwa abantu bakithi ngoba umsebenzi lo ngowethu,” kutsho uMnu Matjaka.
Ukhansila uphinde wagcizelela ukuthi abalimisi baka ward 16 baza sebenzisana labalimisi benhlanganiso leyi ukuze indawo le ithuthuke.
UBuhlebenkosi Moyo ongu ward development co-ordinator uthi abahlali bazimisele ukusebenzela ikusasa labo.
“Siyajabula njengabantu baka ward 16 ukuthi indawo yethu izathuthuka njalo lezifuyo sethu zizathola amanzi eduze kulokuthi zibe zisiyakhatshana zize zilahleke ezinye zitshontshwe njengoba kugcwele ubusela bezifuyo kulu mango,” kuphetha uNkzn uMoyo.—NMCR97.0
