16 Nkwenkwezi 2024
Ngu Primrose Tlou
GWANDA SOUTH- Umsebenzi wokubambana phakathi kwe Zimbabwe kanye le Botswana usulethe impumela enhle kwabanengi, nanko ngeviki ephelileyo ilunga le Gwanda
Anti-Stock Theft Association lithole obabhemi abangamatshumi amabili lanye (21) ababetshontshiwe.
Umsakazo weNtepe Manama uxhumane lomkhokheli weqembu leAnti Stock theft u Victor Vodloza Sibanda oncome ukusebenzelana kuhle phakathi kwamazwe amabili.
“Sibonga kakhulu uxhaso esiluthole kubomakhelwane bethu iBotswana ekuvumbululeni izifuyo ebezicatshile njalo silethemba lokuthi kuzehlisa inani lezifuyo ezilahlekela abalimi mahlayana nje,” kutsho Sibanda.
ULebuhang Utumile obecatshelwe ngobabhemi bakhe ngomnyaka ka2020 uthe uzwa ukuthokoza okukhulu ngoba ethole abanye babobabhemi bakhe.
“Ngangilamadonki alitshumi lasithupha wonke angicatshela ngomnyaka ka2020 kwathi ngomnyaka ophelileyo ngathole amabili, namhla ngiphinde ngathola amanye amabili njalo.Ngilethemba lokuthi ngisazowathola wonke ngokuphelela kwawo ngenxa yomsebenzi lo oqhutshwayo yokudingwa kwezifuyo,”kutsho Utumile.
Omunye wabalimi abavelele kwele Botswana u Otsile Mahare uthe uzwa ethokozile ngoba ethole amanye amadonki akhe ayecatshile.
“Ngilokuthokoza okukhulu ngoba ngitholile idonki yami ebilesikhathi icatshile njalo ngilethemba lokuthi asazothakala amanye asilelayo,” kutsho uMahare.
Ukhansila kaward 17 uNtuthuko Nyathi uncome umsebenzi owenziweyo esithi uzaletha ukuhlaliseka kwabanengi.
“Ngijabulile ngomsebenzi omuhle oqhutshwe ngabantu beManama, lokhu kutshengisela ukuthi amasela kasela ndawo yokucatsha sisonke sizakulungisa,”kutsho uNyathi.
Kudaba oludlulileyo kwatholakala amadonki alitshumi lambili endaweni yaseShanyaugwe lokhu kutshengisa ukuzimisela kwabalimi ekudingeni izifuyo zabo ezacatshayo.
Kungenani lezijeziso eziphiwa amasela ezifuyo, ubusela buqhubekela phambili eGwanda South ikakhulu endaweni yeTshanyawugwe.—𝑵𝒕𝒆𝒑𝒆-𝑴𝒂𝒏𝒂𝒎𝒂𝑭𝑴
