08 Nhlangula 2024
Ngu Bokang Moyo, Ward 20 Focal Person.
Izakhamuzi zeJohnwest kuward 20 zikhala ngendlala enkulu esibahlasele kanye lezifuyo zabo kubangelwa yikuguquka komkhathi okwenziwa yikungani kuhle kwezulu.
Abantu bemhlubulweni lowo baphila ngokulima kanye lokufuya, ngakho ke ukungani kwezulu sekufake impilo zabanengi engcopheni ngoba kungela kudla kwabantu Kanye lezinyamazana.
UNephat Nare oyisakhamuzi uthe selokhe athetshulwa yingwe uziphilisa ngokulima ngakho ke ukungani kwezulu kumlethela ubunzima.
“Impilo yethu ibisekulimeni, iminyaka edluleliyo leyi besithola ukudla okwaneleyo lemuli zethu kuthi nxa kuthe kwasilela besithengisa izifuyo sithenge ukudla. Okwalonyoka asikwazi ukuthi siqalisele ngaphi ngoba lezifuyo kazithengiseki zicakile kakhulu silusizi silapha,” kutsho uNare.
USakhile Tlou uthe ekhaya akusahlaleki ngoba umangoye selala eziko.
“Sokunzima ukuthi ngihlale ekhaya ngoba imbiza zihlala zimhlophe ngenxa yokuswela okokupheka ngapha abantwana bayabe befuna ukudla,” kusitsho uTlou.
Ugcizelele wathi njengezakhimizi bacela ukuthi uhulumende angenele ukuze abantu basizakale.
” Njengabantu abatsha sikhala ngokuthi ngabe uhulumende wethu uyasixhasa ngokusigebhela izikotsho zibezinengi sikwanise ukulima izilimo ezivandeni zethu sithole ukudla”.
USamson Dube ongusobhuku wesigaba uthe umadolonzima ngalesisimo sendlala.
“Njengomkhokheli wesigaba ngiyanxusa uHulumende lenhlanganiso ezitshiyeneyo ukuthi zincedise ngokudla kwabantu lokwezifuyo ngoba abantu lezifuyo bengafa ngendlala,” kusitsho uDube.
Ubuye wathi abantwana besikolo abasafundi kuhle ngenxa yendlala ngoba behamba ezikolo izisu zingela lutho.
“Kunzima abantwana besikolo sebesehluleka lokuya esikolo ngoba bengela mali zokuhlawula esikolo, njalo kabatholi kudla okwanelayo. Izifuyo azisathengwa ngenxa yokuthi azikho kusimo esihle kubangelwayindlala ukuze kubhadalwe indleko zesikolo”.
Izanuse zomkhathi zibika ukuba isomiso lesi senziwa yisomiso esikhulu ese EL-Nino induced drought esihlasele ilizwe lonke jikelele. Isomiso lesi bathi sibangelwa yikuguquka komkhathi okwenza abantu bengatholi izivuno ezifaneleyo.—𝑵𝒕𝒆𝒑𝒆-𝑴𝒂𝒏𝒂𝒎𝒂𝑭𝑴
𝗗𝗶𝗱𝗬𝗼𝘂𝗞𝗻𝗼𝘄 it pays to advertise with Ntepe-Manama Community Radio. You can contact us on the following details.
𝗖𝗮𝗹𝗹𝘀:0772462909.
𝗪𝗵𝗮𝘁𝘀𝗔𝗽𝗽 0779308003 𝗲𝗺𝗮𝗶𝗹:ntepemana@gmail.com.
Click the link below to join our WhatsApp Groups.
Come Advertise With Us.
