06 Nhlangula 2024
Ngu Reaboka J Nare Ward 12 Focal Person
Abahlali beMawaza kanye leNtswangu bahlanganise amakhanda ndawonye baphuma lecebo lokwakha ikiliniki yabo bencediswa ngabantwababo abasemazweni ukuze bathole ukwelatshwa eduzane.
Ikiliniki yakhiwa kulandelwa imigoqo yeGwanda Rural District Council. Ukwakhiwa kwalikilinika sekuqalisile njalo kusesigabeni sesilebhu.
Ukhansila uBrian Nyathi uthe isakhiwo lesi sizakuba lusizo kulesisigaba.
“Umsebenzi oqhutshwa ewadini muhle kakhulu ngiyawuncoma ngoba nxa sesithe saphela isakhiwo abantu bazathola ukusizakala eduze kulokuthi bahambe imango emide besiyalatshwa.”
UMtsumi Kgwatalala, ongumsekeli womkhokheli wekhomithi yokwakhiwa kwekilinika, uthe ubunzima obuhlangana labantu bedinga ukwelatshwa buzaphela.
“Njengabahlali beMawaza le Ntswangu sihlangana lenkinga zokuthi nxa sesigulelwa sisebenzisa izinqola ezicina zipontsha emangweni kubangela ukuthi omama abanengi bebelethele endleleni. Ngakho ke isakhiwo lesi sizakuba lusizo olukhulu,” kusitsho uKgwatalala.
ULisang Dube oyisakhamuzi seMawaza njalo onguye oxhumana labasemazweni uthe ikilinika Ie izancenda izakhamizi labantwana kakhulu ngoba iseduze labantu.
“Umuntu wonke usezasizakala ikakhulu abantwana besikolo ngoba iseduze lathi sonke njalo indleko zemali zizakuba zilutshwane ngoba kuyahambeka ngenyawo,” kusitsho uDube.
Umsakazo kazulu iNtepe Manama Community Radio station uxhumane labanye babantwana abasemazweni abaphathekayo kusakhiwo lesi bathi bazimisele ukuthi isakhiwo lesi siphutshe ukuze abadala baphumule ukuhamba imango emide besiyalatshwa.—𝑵𝒕𝒆𝒑𝒆-𝑴𝒂𝒏𝒂𝒎𝒂𝑭𝑴.
