27 Zibandlela 2026
Ngu Pinky Moyo
Gwanda South- Abahlali baka Ward 5 kanye lo ward 13 baqoqa imali yokukhipha udaka edamu le Garanyemba
eseligcwele udaka letshebetshebe. Ukugcwala kodaka edamu kubangela ukuthi lingagcini amanzi okwesikhathi eside.
Idamu leGaranyemba layakhiwa ngomnyaka ka 1953. Izakhimizi zalowo mango zithola amanzi kulelo damu kanye lezifuyo zabo, ngakho ke ukugqibeleka kwalo kuletha ubunzima obukhulu esigabeni.
Uhlupho oluhlasela abahlali bakuleyo ndawo kakhulu yikubanjelwa kwezifuyo lapho zizama ukuthi zithole amanzi okunatha. Ngomnyaka ophelileyo ngenyanga kaMabasa, abahlali bahlala phansi badla amathambo engqondo ngabangakwenza ngedamu labo baphuma lombono wokuthi kube khona imali ekhitshwayo ngomuzi engange 50rand kukanti labaphetsheya kwemingcele labo kufanele bekhuphe 100rand.
Bakhangele ukuthi kusukela ngenyanga kaMabasa emnyakeni ophelileyo kusiyafika lonyaka ngenyanga ka Mpandula besebekwanisile imali efunekayo yokudinga umtshina wokugebha idamu.
Ongumngcinisihlalo njalo eyisikhulumeli se committee yedamu u Nhlonipho Dube ulandise ngomsebenzi okusamele wenziwe.
“Udaka olusedamu lungaba yi 1,5 metres ukuya phansi esingathi kungaba yi 40 000 tones udaka olukhona kumbe ukudlula. Ngokunjalo abalolwazi bathi kungafuneka 130 tonnes truck ukuthi igijime kanengi isiyachitha udaka,” kusitsho uDube
Omunye wabaqoqi balomsebenzi uLungile Nyathi uchasise ngemali ezifunekayo ukuze imitshina yokugebha isebenze.
“Ekubuzeni kwethu kwabalolwazi ngezokukhipha udaka edamu sithole ukuba kufuneka, iDozer 30 tonne efuna indleko ezingange
US$120.00 ngehola elilodwa njalo ibuya ithengelwe amafutha(diesel),
Excavator 30 tonne yona ifuna US$110.00 ngehola igoqela amafutha akhona idizili
TLB 95us ngehola
igoqela amafutha ayo idiesiel,
tipper truck 400us ngelanga elilodwa,” kusitsho umnunzana Nyathi.
Olilunga lenhlanganiso yokugejwa kwedamu uHenry Mabusa ukhuthaza abantu ukuthi bawuthathele phezulu lumsebenzi
“Ukulunga kwedamu akuyi kusiza labo abahlala eduze kuphela kodwa inengi liyathola uncedo khonapho nxa seligcina amanzi njengakudala. Besicela izandla sibambisane emsebenzini lo ukuze uphumelele,” kusitsho u Mabusa.
Ukufaka izandla kuvulelwe loba ngubani labangaphandle kwelizwe bayenelisa ukuncedisa.
Abantu bezansi yema Ndebeleni baphila ngokufuya lokulima.— 𝑵𝒕𝒆𝒑𝒆-𝑴𝒂𝒏𝒂𝒎𝒂𝑭𝑴
