Entertainment Desk
Ngu Liberty Mutamba
Abathanda amachacho lezigingci babika ngenhliziyo ezimhlophe ukuba umcimbi kaBoohle obuse Mosa House, Gwanda ngempelaviki ubeyimpumela enhle, nanko phela begide kwaze kwasa.
Umcimbi obulethwe yi DTL Records ukuzothakazelela ilanga labo Mama ubone abathanda amachacho be Gwanda bethola ithuba lokuzithokozisa, lokugida ngelanga labo mama.
“Abahlabeleli batshaye kwazwela, angilansolo. Sigide kwaze kwasa. Ukubona abahlabeleli bethu begiya kundawo egcweleyo so, kuyabulisa lokhu. Ngithande ukuthi baphakamise iGwanda lokuthi batshengise iziphiwo zabo. UBoohle uyenze umsebenzi oncomekayo, ngitshayela ihlombe kubantu bonke abenze umcimbi waphumelela,” kutsho. uWonderful Sibanda.
“Kuyajabulisa ukuthola abantu bebambene njalo sithokoza ngendlela leyi. Lokhu kutsho kutshengisa ukuthi simunye eGwanda. Abahlabeleli batshaye kwazwela njalo asila solo. Konke kuhambe ngendlela” kubika uNothando Ngwenya.
Kuthe phakathi kwamabili uFly lo KayKid Umfanomsotho bangena enkundleni batshaya ingoma yabo uMawala etshiye inkundla ilomfutho. UFly waqhubela uZagoe Radge intambo yena ozibambe zaqina. Ingoma yakhe uDlozi yenza indawo yavutha ngamandla. Ngemva kwemizuzu embalwa abantu bengakatholi isikhathi sokukhokha umoya uZhezhingtons wangena ehlabela, wenza abalandeli beqa kakhulu.
UZhezhingtons uthethe ithuba lokuhlabelela abantu ingoma yakhe loBlack major. Umcimbi ububanjwe nguMC Gibbons okhumbuze abalandeli ingoma zakhe azitshaya phambilini esase ku GDA fire.
Ngo 02:45 emadabukakusa yilapho uBoohle agidise uzulu. Ilanga labomama lizahlala likhunjulwa eGwanda nanko phela ebagidise phose ihola lonke. Ingoma zakhe uMina nawe, hamba wena, Shela, Ngibambe eduze ziyenze indawo lelanga labo mama laqala ngendlela. Ukuhlanganise ingoma ezipholileyo lezimfutho yikho okwenze umcimbi lo wajabulisa abantu. Umdlalo uvaliswe ngu DJ Wyqlif yena obhodise imitshina kwaze kwasa abantu belokhu begida. Ethulula ingoma ezithandwa ngumphakathi.
IMosa House ibiqala ngqa ukuyekethelelwa ngamhlabeleli we South Africa. Abaqoqe umcimbi lo, babika ukuba bathande usukelo abaluthole eGwanda, nangu uKudzaishe Noble Matondo (Nosh)
“Sesithole ikhaya elitsha lapha eGwanda, iMosa House ibiqala ngqa ukuthola umcimbi ozayinika isizotha. Besisevalweni kodwa abantu beGwanda basemukele ngezandla zombili, ukugcwalisa indawo entsha besingakukhangelenga. Sithembisa abantu be Gwanda ukuba sizabathokozisa, silenhlelo ezinengi esizikhangeleleyo, esijonge ukuzifeza lapha eMosa house,” kusitsho uNosh.
IDTL isithembise ukuba abantu be Gwanda ukuba bazaba lesikhathi eside sokuzithokozisa.
