3 Mbimbitho 2025
Ngu Liberty Mutamba
Umfundi weNtepe Primary School uDescent Dube owanyamalala kumaviki amabili adlulileyo ngemva kokuthathwa ngumfula utholakale ngeSonto kulandela ukuzimisela okukhulu kwezakhamizi ebezimdinga selokhu wacatshayo.
Ukuthathwa ngamanzi kukaDube kwenza isigaba sika Nhlamba samanyana lama pholisa, ingatsha zikahulunde kudingwa umzimba. Ngenhlanhla umzimba utholakale lokhu sekunikeze imuli ukukhululeka.
“Sibonga izakhamizi zonke zako Nhlamba ezilapha ekhaya laba phetsheya ukusixhasa. Umsebenzi lo siwubone usiba lula ngenxa yokubambama kwabantu bako Nhlamba. Sesithole ukukhululeka ngoba umzimba sesiwubonile njalo uzagcinwa endaweni esithokozisayo. Sibonga kakhulu abantu bakithi ngokusiphathisa, bengadinwa lakusasa,” kutsho uMatsiliso Ngulube, isikhulumeli somdeni.
Usobhuku wesigaba uAbrahama Ndlovu (Rendo) uthi umsebenzi lo utshengise ukubambana kwesigaba.
“Besekuleqembu labantu elihlala emfuleni ligebha ukuze umzimba kaDube utholakale. Abanye beqoqa izimali, abanye benikela ngabalakho ukuze umsebenzi uqhutshwe.
Umzimba wakhe wawugqitshelwe litshebetshebe, esizibeni ” kubika uRendo.
Umzimba kaDube uthwalelwe koBulawayo ukuze kwenziwe ipostmortem. Kukhangelelwe ukuthi uzangcwatshwa kusasa, eBengo ngakibo.
Ommele abantu be Gwanda South Constituency edale lephalamende njalo engumsekeli kaMinister kwezokwethulwa, lokusakazwa kwemibiko uHon Dr Omphile Marupi utshayele ihlombe izakhamizi ngokubamba kuqhutshwa lumsebenzi.
“Ngithanda ukubonga izizalwane lesizwe sika Nduna uNhlamba, izizalwane zika ward 13 lo 14 ,Amapholisa eGuyu,Abe Sub Aqua Unit,CPU,DDC Gwanda,Amatitshala eNtepe,Izisebenzi zika Hulumende, Abamasonto lonke,Izihlobo labangane osoma bhizimusi bethu ubaba uNdonsie, ukhansilawethu uMiclas Ndlovu,bakithi wonke umuntu owathi kusenzeka umonakalo lazimisela ukuma lemuli yako Dube.
“Umsebenzi loo eliwenze lapha uyancomeka kakhulu njalo ungapheleli lapha asiqhubekeni sisenzela abanye njalo. Kuzaba lebhasi ezathwala abantu besuka eNtepe besiya eBengo,” kubika uHon Dr Marupi.
UDube wathathwa ngo Nhlolanja kuleyo viki kulomama (muyi) njalo owathathwa ngamanzi eGaranyemba, ngenhlanhla yena watholakala ngokuphangisa.—𝑵𝒕𝒆𝒑𝒆-𝑴𝒂𝒏𝒂𝒎𝒂𝑭𝑴
