17 Nkwenkwezi 2024
NguMilton Mashasha.
Abalimi bezindawo ezitshiyeneyo bebebuthene ezibayeni zeGungwe bezothengisa inkomo zabo lapho okubonakale intengo ikhuphuka ngezinga eliphezulu nxa kuqathaniswa lentengo yenyanga edlulileyo.
Kunyanga kaMabasa intengo yenkomo ibiqala ku R1500 isiya ku R8000 , kukanti khathesi iqalele ku R3000 kusiyaphezulu kodwa abalimi baveza ukungasuthiseki ngayo.
Umsakazo kazulu oweNtepe Manama Community Radio uxoxe lelunga leGwanda Rural District Council, uMnumzana Langstone Ndou, othe umtshina otshengisa isisindo senkomo ufile okwamanje.
“Umtshina ufile kusamele ulungisiswe, yikho sisebenzisa ibhanti ukudinga isisindo senkomo. Sibone ukuthi sicabangela isisindo zenkomo ngamehlo singapimanga ngesikali kungaletha ukungasuthiseki kubalimi ngakho ke yikho sisebenzisa ibhanti,” kutsho uNdou.
Ukhansila kaward 12 uMnu. Brian Nyathi uthe intengo yenkomo ibingcono kodwa abalimi lokhu belokukhonona.
“lntengo ikhuphukile mbijana lanxa nje kungayisiyo esiyikhangeleleyo, silesicelo sokuthi iqonge ukuze lalabo abathegisayo bathole inzuzo ezabaphilisa lemuli zabo,” kutsho uNyathi.
UFlowrence Sibanda obesuka ePelele elethe inkomo zakhe ezimbili uthe ucine ethengisa eyodwa kuphela ngoba esole intengo yakhona.
“Ngithengise eyodwa eyinye sehlulene kuntengo ngoba ibiphansi kakhulu kulaleyo ebengiyikhangelele.”
UPrevious Mathe ngomunye wabalimi obezothengisa inkomo yakhe kodwa uthe ucine esebuyela layo ekhaya ngoba intengo ingamthokozisi.
“Ngicine sengiyibuyisela ekhaya inkomo ngoba intengo iphansi kakhulu kungabangcono ngidinge umuntu onganginika imali engcono ehambelana lenkomo yami,” kutsho uMathe.
Kukanti uTias Tlou uthe ucine eyithengisa inkomo yakhe loba nje intengo yakhona ibinganhle.
“Ngithengisile inkomo yami ngenxa yomumo engilawo ayisikho kuthanda kwami ngoba intengo ngingavumelani layo.Sicela kulethwe isikali senkomo esiqondileyo ngoba ibhanti leli ebelisetshenziswa kasisuthiseki ngalo njengabalimi,” kutsho uTlou.
Inengi labalimi liphakathi kokukhupha ezinye inkomo ukuze zithengele ezinye isikuba.
Ukungani kuhle kwezulu sekutshiye inkomo zisengozini yokufa ngenxa yokutshabalala kwamadlelo kanye lokutsha kwamadamu.—𝑵𝒕𝒆𝒑𝒆-𝑴𝒂𝒏𝒂𝒎𝒂𝑭𝑴 @ lesego.
