BY COMMUNITY REPORTER
GWANDA- Abahlali besiqintini seGwanda ku Ward 7 baqhubeka bevota lapho bekhetha ozabamele edale lasekhansilini.
Ama By Elections abuya kulandela ukwesulwa kukaJastone Mazhale owayephethe lesi isihlalo. UMazhale wasuswa esihlalweni nguDouglas Mwonzora ngo2020.
UMazhale ufuna ukuvotelwa futhi ekubandla le-Citizens Coalition for Change (CCC). Abanye abakumbango lo nguVusani Mhlanga (MDC-T), Thembani Mathuthu ( Zanu PF), lo Lizwe Nyathi (ZAPU).
Abahlali beGwanda asebevela phosa amavoti abo baxoxisane lentatheli zindaba yeNtepe-Manama lapho abachaze ukuba ukuqhutshwa kokhetho kuhamba kuhle.
Omunye wabavotele epolling station ebizwa ngokuthi yi Zaoga tent ongathandanga ukuziqamba ngebizo uthe:
“Ekuvoteni semukelwe kuhle sibili. Okokuqala bekunanzelelwa ukuvikela ukukumemetheka kobhubhane lweCovid-19, bahlole isithupha, bahlole inzipho, bakhangela lebizo lami lalapho engihlala khona besebelicitsha ekucineni besebengipha iballot paper bengifundisa ukuthi ngivota njani.
“Angizange ngisole lutho sibili ngibone nje yonke into ihamba ngendlela eqondileyo”.
Omunye wabasakhulayo obevela phosa elakhe ivoti epolling station yeJahunda park oziqambe ngokuthi nguMoyos uthe unanzelele ukuba ama ballot papers akakhanyi kahle okungathwalisa nzima ogogo labokhulu.
“Bekuzaba kuhle ngabe imfanekiso ekuma ballot papers iyenzwe yakhanya njalo yabankulu ngoba lokhu sekungenza ukuba kube lamaphepha amanengi aphambanisekileyo.
“Kungasenani sithemba ukuba loluhlelo luzahamba kahle luze luyephutsha,” kutsho uMoyos.
NMCR#2022
