8 Ncwabakazi 2023
Akusathembisi ezivandeni ngenxa yokutshazwa kwezilimo.
Ngu Mpokiseng Sibanda
Sezitshaziwe izilimo esigabeni sika Ward 15 eZansi yedolobho leGwanda. Abalimi besigabeni basele bedanile ngemva kokuba izilimo zabo ebezilinywe duze ledamu leMakapakapa zitshazwe okucatshangelwa ukuba kwenzwe ngumqando obekhona ekuqaleni kukaNcwabakazi.
Ababona ngezomkhathi bathe umtshazo lo ubangelwe yikuqubuka kwamakhaza avelela kweleMzansi lapho okwakhithika khona ingqwaqwane kunyanga edluleyo. Lokhu kwenza kwabalomqando omkhulu osuke waphambanisa izilimo.
uNkosikazi Sibongile Ncube oyisakhamuzi njalo engumlimi weMakapakapa ubonise ukudana ngesimo asebebhekane laso lapho sebemoshakelelwe yizilimo. Ekhuluma lentatheli zindaba yomsakazo kazulu uthe,
“Zitshaziwe izilimo singakhangelelanga sisithi kudlulile okokutshaza kanti asingabuzanga elangeni, besesikhangelele ukuthi sizakudla kanti ke hatshi akunjalo, okungidanisayo kakhulu yikuthi indlala yesitshebo isizasihlasela esigabeni,” kutsho unkosikazi Ncube.
Uqhubekele phambili esithi, “Kutshaziwe phose izingadi zonke lapha edamu. Besizamile ukuyilwisa indlala yesitshebo leyetiye kodwa konke akusathembisi, besilime izilimo ezifana lembhida, imbambayila kanye lamabanana.”
Ngaphandle kwezilimo, lelikhaza libe lesidumbu edolobheni lako Bulawayo lapho okubhubhe ujaha obehlala ezitaladeni. Ngokunjalo izanunse zomkathi zithi ikhaza kalikapheli, abantu kabazivikele ngokugqoka okukhudumalayo ikakhulu abantwana abancane.
Labo abafuna uku Advertiser amabhizimusi abo lingasithinta kulezi nombolo,
calls: 0772462909. WhatsApp: 0779308003. email: ntepemana@gmail.com
Hlaba i link elandelayo ukuze ungene ku WhatsApp Group yethu
https://chat.whatsapp.com/Hi7whkU94RL2KRxHblUZUM
