Ngu Liberty Mutamba
IManama High ibuthe izicoco ezinengi kumncintiswano we Matabeleland South School of Creative Arts Drive (SCAD) lapho izikolo eziqoqwe kuziqinti zonke eziyiskhombisa beziqhudelene e Gwanda District Club kumncintiswano we drama, kwezomculo, ukuhaya, Textile Design, kanye le public speaking, ngempelaviki.
Umfundi weManama uTholakele Mpofu obekhokhela kuchoir utshiye abalandeli bewomele okunengi. Iphimbo lakhe lisukumise iflag yesikolo. Lokhu kwenze ukuba isicoco se choir sinikwe iManama High, ikanti uMpofu uthole isicoco sakhe yedwa esokuhlabelela.
Iphinde yabayintshantshu njalo ku nkondlo, betshengisa ukuba bazimbongi ezisakhulayo.
Kukanti kudrama isekelane le Mzinyathini, yona etshengise ubungcitshi kwelelo hlandla.
Isikolo seGwanda High sibeyingcitshi kwezo mceco, lapho abafundi bakuleso sikolo bebegiya ngelembu akhanga amehlo kazulu.
Kukanti kupublic speaking uAudrey Jerera we Mzinyathini High ubeyingcitshi kulelo hlandla ubesikhipha ngamakhala umntwana oyinkazana. UJerera lilunga lephalemende enkundleni yabatsha, ukhangele iUmzingwane Constituency.
Imncintiswano le yasungulwa ukuxhasa iEducation 5.0 model lapho intsha zincediswa ukuzithuthukisa ikakhulu kwezombukiso, lokunanza amathalenta abantwana besase bancane.
Umncintiswano lo uqoqwe yi TIME- project ekhokhelwa ngu Adrian (Drivo) Musa. Inhlanganiso le isebenze leMinistry of Primary and Secondary Education kanye le Ministry of Sports Recreation Arts and Culture lezinye ingatsha zikahulumende lezizimele zodwa ukuphakamisa intsha kwezombukiso.
Umgcinisihlalo uMusa uthi abantwana badinga uxhaso lwabazali lababalisi ukuze bafeze iziphiwo zabo.
“Singananzelela esikolo, abanye balesiphiwo kunombolo abanye balesiphiwo ekulimeni. Kukanti abanye baphiwe kwezombukiso. Abantwana labo badinga amathuba loxhaso olufanayo, oluvela kubabalisi abazali lozulu wonke jikelele ukuze bafeze amaphupho abo. Sesikuzinga lokuba imibukiso isingathatha umntwana imhambise katshana, asibaxhaseni. Asamukeleni abantwana abafuna abale phupho lelo singabanqabi,” kutsho uMusa.
IYASA, Zhezhingtons lo mgidi osakhulayo eGwanda uGama bebethokozisa uzulu kulu mncintiswano.
Hlaba ilink elandelayo ukuze ungene ku-WhatsApp group yethu.
