Nhlangula 12, 2024.
Ngu Jonah B Moyo.
(Umfanekiso: Izakhamizi zika Ward 17.)
Abalimi bakhuthazwa ukuthi baqakathekise imitshiso ezifuyweni zabo njalo babone ukuthi ifakwa ngendlela eqondileyo ukuze bavikeleke ekutshontshweni kwezifuyo osekubhahile ikakhulu ezansi yemaNdebeleni.
Lokhu kukhulunywe emhlanganweni oqhutshwe ngama pholisa eManama kuward 17 lapho obekuthe gwaqa khona izakhamizi zithola imfundiso ukuze zivikele izifuyo zabo ebuseleni osobukhona.
USuperintendent Sondasi Muunga uthe abalimi kumele bafake izifuyo zabo imitshiso ukuze kube Lula ukuthi zitholakale lapho sezithe zalahleka.
“ Kuqakathekile ukuthi lifake izifuyo zenu umtshiso(brand) ngendlela eqondileyo ukwenzela ukuthi zitholakale nxa sezithe zalahleka ngoba kuncedisa amapholisa ukuthi babekwazi ukuthi umtshiso ngowaliphi icele lelizwe njalo kwenza kubelula ukulonda umnikazi wezifuyo,” kutsho uMuunga.
Uqhubeke wathi kuqakathekile ukuthi abalimi bakhulumisane lenkokheli zabo ezisesigabeni lapho nxa befuna ukuthengisa izifuyo zabo.
“Nxa lifuna ukuthengisa izifuyo tshelani osobhuku benu babekwazi kanye lelanga elizathengisa ngalo ukwenzela ukuthi mhla kubuya abomthetho ukuzo khangela ngokusemthethweni (clear) isifuyo usobhuku laye abekhona ngoba nguye okwaziyo ngezifuyo ezisendaweni yakhe,” kutsho superintendent Muunga.
“Kulicala ukuthengisa isifuyo esingasiso sakho njalo thengisa isifuyo esilo mtshiso ukuze kusasa kungahluphi nxa omunye esisithi ngeyakhe ebona uphawu olufanana lolwakhe ngoba impawu zilakho ukufanana lakwezinye izigaba elakhelane lazo”,.
Okhangele ngezobusela bezifuyo (stock theft) uSayijeni Mduduzi Sibanda uthe abafuyi baqaphele ukuthi umtshiso ufakwa ngendlela eqondileyo.
“Liqaphele nxa litshisa izifuyo zenu ukuthi umtshiso kumele ube horizontal ukuze utshengise ukuthi ngowe Mat-South, ngoba isiqinti ngesiqindi silendlela esitshisa ngayo. Indlela umtshiso oma ngayo esifuyweni utsho ukuthi isifuyo lesi ngesasiphi isiqinti, njalo inkomo uma kuthiwa ziyatshiswa edibheni asizihambiseni ngoba lapho kuyabe kufakwa umtshiso obiza i ndawo yakini ukuze kusasa kube lula uma sesidinga umnikazi wenkomo”, kutsho uSibanda.
U-Inspector Raphael Mataga ongumqondisi enkambeni ye Guyu, uthe izifuyo ezintulayo umnikazi engaziwa lokuthi ngubani ziyathengiswa yikhansili
“Izifuyo ezibizwa kuthiwa ngama stray okutsho izifuyo eziswele abanikazi ziyathengiswa yi khansili ngemva kwesikhathi kodwa eziyabe zilomtshiso azithengiswa ngoba ziyabe zilabanikazi siyakhangela ku registry ukuthi isifuyo lesi ngesangaphi besesithumela umbiko kubanikazi,” kutsho uMatanga.
UMnunzama Raphael Matanga ukhuthaze uzulu ukuthi asebenzisane labomthetho ukuthi babophe amasela enkomo.
“Umphakathi kawusukumele phezulu nxa kuthe kwaba lodletshana mayelana lamasela enkomo asazise kuseselesikhathi ukwemzela ukuthi kutholwe isixazululo kusesemasinyane,” kutsho uMatanga.
UThomas Dube oyisakhamuzi seGohole ubonge kakhulu imfundiso ayithole emhlanganweni.
“Lokhu obekukhulunywa ngabomthetho kungivule ingqodo ngoba abanye abantu nxa betshisa inkomo bagcwalisa umtshiso umzimba wonke bengakhangeli ukuthi umtshiso ume njani kusuke kuyenza kube nzima ukuthi abantu babone ukuthi inkomo ngekabani,” kutsho uDube.
UDube ubuye wasola abomthetho indlela abaqhuba ngayo umsebenzi wabo ekuvikeleni ukutshontshwa kwezifuyo.
“Ngizwa ngilokungathokozi kakhulu ngendlela abomthetho abasebenza ngayo okucina kubangela ukuthi izifuyo zethu singazitholi ngoba nxa sithe sabophisa isela lenkomo ngemva kwensuku ezimbalwa silibona selikhitshiswe intolongweni singazange sithole isigwebo esifaneleyo,” kutsho uDube.
Abomthetho babuye bahlafuna udaba oseluhluphile esigabeni olokuhlukumezana kwabathatheneyo kanye labasemathandweni.
UAssistant Inspector Chiratidzo Dube owe Gwanda District Community relations uthe abantu kabayekele ukulwa emakhaya kodwa bathandane.
“Asiyekeleni ukulwa ezindlini kodwa lithandane likhulise abantwana ndawonye ngoba ukutshayana kucina kudala ukuthi omunye acine ebotshwa esiyahlala ejele abantwana becine bekhiliswa ngumzali oyedwa ngoba ukuhlukumezana kuyabophisa,”kusitsho uDube.
Ukhansila ka ward 17 uMnu Ntuthuko Mabulala Nyathi ubonge abamthetho ngokuxhumana lozulu bebapha imfundiso eyakhayo.
“Siyabonga ukuthi abomthetho babuye bazokhuluma lomphakathi ngendaba ezinengi ezitshiyeneyo njalo sithemba ukuthi uzulu uzayithath imfundiso leyi ayisebenzise ngokuhlakanipha,” kutsho uMabulala.—𝙉𝙩𝙚𝙥𝙚-𝙈𝙖𝙣𝙖𝙢𝙖𝙁𝙈
——————————————————————————————-
#𝗗𝗶𝗱𝗬𝗼𝘂𝗞𝗻𝗼𝘄 it pays to advertise with Ntepe-Manama Community Radio. You can contact us on the following details.
𝗖𝗮𝗹𝗹𝘀:0772462909.
𝗪𝗵𝗮𝘁𝘀𝗔𝗽𝗽 0779308003 𝗲𝗺𝗮𝗶𝗹:ntepemana@gmail.com.
Click the link below to join our WhatsApp Groups.
https://chat.whatsapp.com/Hi7whkU94RL2KRxHblUZUM
Come Advertise With Us.
