23 Mbimbitho 2024
Ngu Mpokiseng Sibanda.
Izakhamizi zikaward 15 ngaphansi kwenduna ubaba uchief Marupi zikhala ngesimo sendlala esikhona emasimini, laku ndawo zonke jikelele.
Ukungani kuhle kwezulu umnyaka lowu sekubangele ubunzima phakathi kwabantu, nangu uMolefel Sedange.
“Isimo esikhona emasimini lonyaka sinzima kakhulu nxa sikhangela nje esiqintini sezansi yemaNdebeleni lonyaka ngoba akulanto ezaphuma sesiphelelwe lithemba ekuthini obephalele longaphalelanga phose kube sezingeni linye okugoqela zonke izilimo emasimini,” kutsho uSedange.
Izakhamizi zihlalele evalweni nanko inyamazana lazo zisidla leyo mbijana ekhona, uSibongile Ncube uthi indlala yalonyaka izama nzima.
“Silusizi kakhulu ngesimo esikhona lonyaka ngoba okungamakhabe esilakho akunganani kodwa ubudli benyamazana buyanda ngamandla obugoqela intothoviyane entangeni, izilumaluma endumbeni,inkawu kanye lendwangu zibuye ngamandla,” kutsho uNcube.
Eqhubeka ekhuluma lentatheli yomsakazo kazulu oweNtepe-Manama Community Radio uthi, omama bavame ukudanela ezivandeni kodwa lonyaka lalkho kunzima.
“Ubudli buhlasele lezingadini lapho esithi sikhangelele okwesivuno esebanga elincane lokuziphilisa masinyane. Lakho kukhanya kuyala ngoba asiboni lutho oluphumayo,” kutsho uNcube
Omunye wabalimi umama uRejoice Sibanda ukhuthaza uzulu ukuba angahlali phezulu kwezandla kababuye lamaqhinga azayenza inzuzo bencedisana ukuba kube lokudla emakhaya. Uthi kungenziwa amaproject abantu babelihlekana beqale ukufuya inkukhu, kumbe imbuzi bencediswa ngabalimisi.
