23 Mbimbitho 2024.
NguMilton Mashasha
KUDABA oluyimpicabadala kulendoda, elwisane lesilo ngezandla yayinqoba emdaweni yase Matanagombe kumalanga ambalwa adlulileyo.
UMnu Mokibelo Mashila uhlangane lesilo entabeni siphuma ebhalwini, sameqela saqala ukumluma inyawo ngesikhathi esehla evela xotshanisa indwangu ezisusa emasimini.
Isehlakalo lesi senzakale esigabeni seMbulisangoma ngaphansi kukaSobhuku uThupeho Tumelo Mpezhegwa. Umnu Mashila uqunge isibindi walwisana lesilo ngezandla saze sabaleka.
Ekhuluma lomsakazo weNtepe-Manama Community Radio uthi isehlakalo lesi simtshiye emadolo nzima.
“Amasimu ami aphansi kwentaba inyamazama ezinjengendwangu ziyabe zihlupha emasimini. Ngathola indwangu zigcwele emasimini ngazixotshanisa ngakhwela lazo intaba. Ngithe sengisehla ngabona okuyinto okunje ngenyoka ngahle ngatshintsha indlela engangisehla ngayo ngabhoda kwelinye icele.”
” Dukuduku lokuyinyamazana okumnyama okulingana lenkawu kodwa kulenyawo ezimfitshane nanko kungeqela enyaweni kwangiluma. Bengingelalutho engiluphetheyo ezandleni ngahle ngazinikela njengomuntu awalwa impi yenkululeko ngakuqonda mathupa,”kutsho uMashila.
UMashila uthi kakwazi ukuthi isibindi usithethe ngaphi ngoba leso silo basibuya ngamandla.
“Kungiluma izandla lenyawo,ngakubamba ngentamo ngakukhama ngakutshayelela phansi. Kwangiquma umumwe,ngaqunga isibindi kunjalo ngakubamba ngentamo ngakutshayelela elitsheni ngadobha embokodo ngakutshaya yikho ukubaleka kwakho,” kutsho uMashila.
UMashila uthe akayiqondi kuhle inyamazana emlumileyo.
“Inyamazana yakhona angiyiqondi kuhle kodwa ngiyifanisa laleyi ethiwa ngumatshwani, kulandisa uMashila
Ngemva kwesehlakalo lesi uMashila wahanjiswa esibhedlela seManama wacina edluliselwe esibhedlela seGwanda lapho afika wafakwa insimbi zokuthi aqinise iminwe.
UJunitha Moyo oyisakhamuzi kuleso sigaba uthe basele betshe amathe ngesehlakalo leso.
“Asikaze sikubone okunje selokhe sayakha kuleyi ndawo kambe umuntu elunywe yinyamazana ngendlela ebhuhlungu kangaka,kuyethusa lokhu ngoba ulimele ubaba uMashila, ” kusitsho uMoyo.
Ukuguquka komumo womkhathi kulethe indlala enkulu ezinyamazaneni zasendle ngoba kungasela lutho emadlelweno azo. Lokhu sekubangele ukuthi kube lokulwisana phakathi kwenyamazana zasendle kanye labantu.
Imonakalo enjengaleyi ivame ukubangelwa yikuswelakala kwamanzi lokudla kwenyamazana zeganga. Sekumele abantu bananzelele,baphange bazise ababona ngokuvikelwa lokugcinwa kwenyamazana zasedle kumbe amapholisa nxa behlaselwa zinyamazana.
