19 Mabasa 2024.
Ngu Milton Mashasha.
Gwanda South -Abalimi balokukhonona ngenani lemali asebelithola nxa bethengisa izifuyo zabo ngoba lokhe ihlala isehla mihla lemihla okwenza bacine bengela nzuzo andubana sebethengise izifuyo zabo.
Lokhu kuvele ngemuva kokuhlangana kwabalimi eGungwe lapho okuqhutshelwe khona umbukiso obuqoqe abantu abasuka endaweni ezitshiyeneyo bezobikisa impahla zabo. Ingxenye yabantu ibisukela endaweni ezinjenge Gwanda,Bulawayo kanye lakwezinye indawo jikelele.
Intengo yenkomo ibiqalisela kunani elingange R1500 kusiya kuR8000 ngemali yeNingizimu Africa kumbe$150 kusiya ku$400 ngamadola eMelika kusiya ngokukhula kwenkomo, ubunzima bayo kanye leminyaka yayo.
UPatricia Mashila obesukela kuward 16 uthe inzuzo ayithole andubana esethengise inkomo yakhe ibingathokozisi.
“Bengilethe inkomo ezimbili kodwa ngicine ngithengisa eyodwa ngabuyisela eyinye ekhaya ngoba ngibone intengo yakhona ingajabilisi, leyo engiyithengisileyo ngiyithengise ngoba kungela engingakwenza ngoba ngidinga imali yokuthenga ukudla kwezinye inkomo kodwa ayenelisi ukuthi ngithenge ukudla okwaneleyo. Besicela kakhulu njengabalimi ukuthi kulungisiswe intengo ikhuphuke ukuze sithole imbijana nxa sithe sathengisa,” kutsho uMashila.
URegina Moyo obesukela esigabeni sePelele uthe njengomlimi uzwa ephela amandla ngenxa yentengo yezifuyo.
“Ngithengisile inkomo kodwa hatshi kubuhlungu ngoba intengo iphansi kakhulu, sicela ababona ngokuthenga lokuthengiselana kwezifuyo bangenele.
Ngizibisele ezinye inkomo ebekumele ngizithengise ngibona ukuthi akulanzuzo ekhona ngoba njengabalimi siyabe sikhangelele inzuzo nxa sesithe sathengisa izifuyo zethu,” kutsho uMoyo.
URodgers Nyathi ongomunye wabalimi uthe ubelesifiso sokuthengisa inkomo yakhe kodwa wasuka wacobeka amadolo lapho esizwa intengo yakhona.
“Bengilesifiso sokuthengisa inkomo yami kodwa intengo yakhona isuke yaba phansi kakhulu okusuke kwangenza ngatshintsha ingqondo ngoba intengo yakhona ingahambelani lenani lesikali senkomo,” kusitsho uNyathi.
UMetah Tlou oyisakhamuzi eGungwe uthi ufuqwe yisimo ukuthi athengise kodwa inhliziyo ayisuthisekanga.
Ngithengisile ngoba ngifuna ukuthi ngidingele ezinye ukudla engxenye zingaphepha kulindlala esikhangelene layo, kodwa labo abathengayo kumele bemukele isicelo sethu ukuthi intengo ikhuphuke kancane. Inkomo zethu siyazelusa sidinga njalo lemithi yokuzelapha lokunye okudinga inhlawulo ,yikho sicela intengo ikhangelisiswe kulungiswe,” kutsho uTlou.
Umsakazo kazulu iNtepe Manama Community Radio ixhumane lesiphathamandla seRural Distric Council uBusani Jonathan Nsingo onguye omemezela ngentengo yenkomo uthe akula nani elimisiweyo okumele lisetshenziswe nxa kuthengwa inkomo.
“Emhlubulweni wakithi eMatebeleland South siphepha ngezifuyo kukanti ngale kulowa mhlubulo baphepha ngegwayi kanye loshinda singakhangela igwayi loshinda kulentengo eyafakwayo okusemthethweni ukuthi lithengwa malini nxa selizothengiswa kukanti intengo yenkomo akula efakiyo okusemthethweni nxa zithengiswa kumele kube laleyo intengo lapho okuthengiswa khona inkomo,uyathola ukuthi intengo yenkomo ayihambelani lobunzima isisindo senkomo(KGS),intengo yenkomo kumele iqale kubunzima bayo nxa bulinganiswa lokuthi isisindo sinye silentengo enganani.
Ukhuthaze abalimi ukuthi bangathengisi inkomo okungekho emthethweni.
“Ngiyakhuthaza abalimi ukuthi bengathengiseli inkomo ezibayeni emizini yabo kodwa kababuye lazo embukisweni okulomphakathi khona ukwenzelwa ukuthi kuyehlise udaba lokutshontshwa kwenkomo oselubhahile elizweni lonke jikelele. zokutshotshwa kwezifuyo,” kutsho Nsingo.@ lesegoβπ΅ππππ-π΄πππππππ΄.
