26 Mabasa 2024
By Mpokiseng Sibanda.
Inhlanganiso ye Edward Ndlovu Memorial Trust ihlanganele lezakhamuzi zika ward 17 kumbuthano wokuthakazelela uhlelo lokufuya imbuzi oluqhutshela kuleso sigaba.
Inhlanganiso leyi iqhuba uhlelo lwe pass on scheme endaweni yeManama Abbatoir kuward 17 ngaphansi kukakhansila uNtuthuko Nyathi.
IEdward Ndlovu Memorial Trust iqhuba lezinye inhlelo zentuthuko esigabeni ijonge ukuthi ithuthukise impilo kazulu kwezomnotho ngalokhu abalakho ngombono owodwa okubizwa ngokuthi study circle.
USiphiwe Moyo uthe inhlelo lezi zijonge ukuthi zithuthukise abasakhulayo.
“Injongo lenhloso zenhlelo lezi yikuba lombono munye wentuthuko kanye lokufundisa abantwabethu impilo engcono eyehlukene lale ebesiyiphila ngasemandulo sisakhula,lalapho nxa sikhangela ukufuya imbuzi zibe lohlonzi isisindo kanye lokuxhumana lomkamba,” kutsho uMoyo.
Ugcizelele wathi sebelesikhathi eside besondla imuli zabo ngalezinhlelo.
“Inhlanganelo zabo ziqalele esigabeni phansi kusiya ewadini kuze kufike kusiqinti njalo lokhu bakusungula ngomnyaka ka2008 okokufundisana besemaqenjini ukuze basizakale ngombono owodwa ofananayo”.
Ubaba uMichael Moyo ongomunye walinhlanganiso ye Edward Ndlovu Memorial Trust uthi kuqakathekile ukuthi abantu baphiwe ulwazi olufaneleyo ukuze benelise ukuziphilisa.
“Siqalise linhlanganiso sibona kufanele ukuthi sabele abalimi ulwazi olugcweleyo ngokubafundisa ukuze benelise ukuzenzela sebethole imfundiso silenhlelo kuma library ezikolo ezisesigabeni zesiqinti njalo silokhu siqhubeka ukuze zonke indawo zithole ulwazi olujulileyo lokusekela abantwana abaswelayo ezikolo,” kusitsho uMoyo.
UNtuthuko Nyathi ukhuthaze izakhamizi ukuthi ziqine ngenhlelo lezi eziqhutshwa ezigabeni zabo zingabuyeli emuva.
“Bazali you are not lost in choosing this project ,there is power in numbers and unity bt easy to run alone”.Akulamthuso wembuzi kodwa umthuso wazo yikuzinakekela lokuzilondoloza kuhle,” kutsho uNyathi.
Umphathiswa Ncube ongumongameli wamakhansila njalo ekhokhela iGwanda Rural District Development committee uthe omama kufanele baphatheke enhlelweni lezo ukuze zithuthuke.
“Asixhumaneni lobukhokheli bonke besigaba labo bonke abazali njalo sike sikhulule omama bangene kunhlelo zentuthuko bathengise imbuzi badle imali yakhona yikho lapho okuba khona lonanzelelo lokuthi zibuya ngesikhathi zivalelwe ngesikhathi njalo zinathe futhi ngesikhathi,” kutsho uNcube.
Umkhokheli wesigaba seDibilashaba community land ubaba uMarupi ukhuthaze abantu baphatheke enhlelweni lezi ukuze ziqhubekele phambili.
“Ngikhuthaza abantu bonke ukuthi bazizwe bethintheka ekwenzeni imisebenzi yezandla njalo kuxhunywe labasakhulayo kumisebenzi yezandla kwehlise izinga lobusela eseliyindaba esegudwini,” kutsho uMarupi.—𝑵𝒕𝒆𝒑𝒆-𝑴𝒂𝒏𝒂𝒎𝒂𝑭𝑴
