29 Mabasa 2024
Ngu Liberty Mutamba
GWANDA-SOUTH Kudaba olutshwaqisa umzimba kule ndoda etholakale ifile eCauseway-Line ngaphansi kwe nduna uNhlamba, ngoLwesine ekuseni.
Izakhamizi zakulowo mango zithi isidumbu sitholakale silenxeba elikhulu emzimbeni njalo kucatshangelwa ukuthi umufi engabe eganyuliwe, evelela endaweni zokuzithokozisa.
Umufi kubikwa kuthiwa nguMbuso Ndlovu. ubhubhe eleminyaka engu37.
Isakhamuzi esingathandanga ukuqanjwa ngebizo sithe indaba le ayibaphathanga njengezakhamuzi.
“Simadolo nzima ngesehlakalo lesi njalo asikwazi ukuba ngubani ongaba lenhliziyo elukhuni kangaka. Thina uNdlovu besimazi njengo muntu ozithandela abantu kanye lokuhleka. Sisamelele amapholisa ukuthi acubungule indaba le ngokugcweleyo ngoba sidinga iqiniso,” kutsho isakhumuzi.
Umsakazo kazulu uxhumane lesikhulumeli somdeni uChris Ndlovu othe kabalamazwi ngendaba abahlangane layo emulini.
“Silusizi ngendaba kaMbuso, ukufa ngendlela enje kubuhlungu njalo sizizwa silahlekwele njengo mdeni. Amapholisa athi basacubungula indaba ngokugcweleyo njalo umzimba wakhe uzathwalelwa koBulawayo (postmortem) kuze kuhlolisiswe ngokugcweleyo imbangela yokufa.
“Sibonga izihlobo labangane ngokusixhasa ngesikhathi lesi, usekelo lolu siyalubonga kakhulu,” kutsho uNdlovu.
Umnunzana Ndlovu ubike ukuthi umsebenzi wokubekwa kukamufi uzakuba ngoLwesithathu eMkhonyeni.
Amapholisa abika ukuba uphenyo lusaqhutshwa njalo, bakhuthaza uzulu ukuba nxa elolwazi ngokudlula kuka Ndlovu babancedise ekuphenyeni.-𝑵𝒕𝒆𝒑𝒆-𝑴𝒂𝒏𝒂𝒎𝒂𝑭𝑴
