18 Nkwenkwenzi 2024.
Ngu Milton Mashasha.
GWANDA SOUTH- Zisele zimadolo nzima izakhamizi ngenxa yentombazana eleminyaka engu18 efe igwazwa lijaha layo ngoba ibuze ukuthi kuzasetshenziswani ukuthi kuphekwe.
Kubikwa umufi u ltumeleng Dube ubezalwa eSengezane endaweni yeGumbile. Ubhubhe ngoMgqibelo ngehola lesificaminwemibili ntambama koMaqethuka eMangwe ngemva kokugwazwa lijaha lakhe abekade ehlalisana lalo.
Ijaha laphiwa igas cylinder ukuthi liyefakisa umoya kodwa labuya lingafakisanga okwacina kusenza umufi abuze ukuthi kuzasetshenziswani ukuze kuphekwe. Umbuzo womufi wacunula ijaha okwadala ukuthi licine limgwaza ekhwapheni kanye lesandleni senxele wahle waphela khonapho.
UMorgan wasuka wabaleka waya kibo lapho afika khona wabika umonakalo awudalileyo, abakibo bamxwayisa ukuthi ayezinekela emapholiseni kwahle kwaba yikuvalelwa kwakhe enkantolo.
Umsakazo kazulu iNtepe Manama Community Radio ixhumane loSarah Mlanduli ubabakazi kamufi emngcwabeni eSengezani lapho aveze ukudabuka okukhulu ethi isiga lesi sibatshiye bephele amandla.
“Ngimadolo nzima ngokufa kuka Itumeleng ngoba besingakhangelelanga ukuthi kungenzeka isiga esifana lalesi ngibuhlungu emoyeni ngoba wasuka ekhaya engumuntu oya emsebenzini kukanti yikuya lahlekelwa kwakhe ngumphefumulo,” kusitsho uMlanduli.
UEveline Dube oyisakhamuzi seBhadani-line eSengezane obekhona emngcwabeni ukhulume lomsakazo kazulu etshengisa ukudana okukhulu esithi ukufa kwentombazana kubalethele ukuhlulukelwa njengezakhamizi.
“kulusizi untombazana lo esingaye la namhlanje ubengumuntu omncane kakhulu njalo lendlela asitshiye ngayo ibuhlungu isidabula inhliziyo sibuhlungu kakhulu,” kutsho uDube.
Kumalanga ambalwa adlulileyo abantu kwele Gwanda South badlula emhlabeni ngendlela engajwayekelanga.—𝑵𝒕𝒆𝒑𝒆-𝑴𝒂𝒏𝒂𝒎𝒂𝑭𝑴
