28 Nkwenkwenzi 2024
NguMilton Mashasha loReaboka Nare
GUNGWE – Uzulu ubethe gwaqa eGungwe phansi kwenduna uMathe ngoMgqibelo lapho kulondolozwa iqhawe uRetired Major Abdul Credit Gabriel Nyathi obhubhe kuviki edlulileyo.
UNyathi obeleminyaka engu-70 uphiwe inhlonipho yeLiberation war hero ngumongameli welizwe ngenxa yokuzimisela kwakhe kumpi yenkululeko kanye lemisebenzi ayiqhube elizweni lonke jikelele.
Umphathintambo obona ngokwenzakala eZansi yemaNdebeleni UNkosikazi Eveline Ndlovu uthe ilizwe lilahlekelwe kakhulu ngoba uNyathi ebezimisele ukusebenzela ilizwe.
“Silahlekelwe kakhulu njengesizwe ngokutshiywa nguNyathi obengumlweli wenkululeko, njalo engumlimi phansi kogatsha lweLand Commission. UNyathi ngomunye wabanye abafulathela amakhaya baya empini ukuze akhulule ilizwe.
Indodakazi yakhe uAmkelwe uthi uyise ebethanda kakhulu Ukufuya.
“Ubaba ubengumuntu othanda ukulima lokufuya . Ngithi makathole ukuphumula uyidlalile indima yakhe njengomzali.”
UMeli wedale lephalamende eGwanda South njalo engumsekeli kamphathintambo obona ngokukhitshwa kwembiko, uMnu Omphile Marupi uthi uNyathi ebeligugi elizweni.
“Silahlekelwe kakhulu hatshi eGwanda kodwa ilizwe lonke, ubaba ubengumuntu obekhaliphile kakhulu. Singakhangela kuLand Commission, UNyathi ube ngumuntu obethembekile, obesima eqinisweni, ehamba ekuqondeni, ngemisebenzi yakhe leqiniso kwamenza abeku Zimbabwe Land Commission. Yikulahlekelwa okukhulu kakhulu ngoba ubethembekile njalo engumkhokheli okhokhela ngobuqotho,” kutsho uMarupi.
Umsakakazo kazulu iNtepe Manama Community Radio uxhumane njalo loCommissioner Tendai Bare ongumgcinisihlalo weZimbabwe Land Commission othe njengenhlanganiso basele egcekeni.
“UNyathi ubesebenza ngokuzinikela njengomsekeli weZimbabwe Land Commission. Ubehlala amadale kwezo mhlabathi ayenze umsebenzi wakhe kuhle engathathi cele nxa kulokudonselana okuthile axazulule indaba ngendlela esuthisa amacele womabili. Ubeletha ukuthula lokubambana kubalimi lokuhlalisana.
“URetired Major Nyathi liqhawe lamaqhawe, kimi ubengumduli wamandla ikakhulu kudaba lwezomhlabathi, ngeqiniso ngumuntu obeme eqinisweni kulizwe lakhe,”kutsho uCommissioner Bare.
Imbongi elodumo UMnu. uAlbert Nyathi uthi basele egcekeni njengemuli.
“Silahlekelwe ngumthunzi wemuli ubengumfowethu thina besimbiza Gabby, eKafusi bayakwazi ukuthi ibizo lakhe beselithethwe yimi ngenxa yemisebenzi yakhe emihle ngibizwa Gabby ekhaya. Besijabula njalo nje lomfowethu uAbdul ngoba ngumuntu obekhululekile, silahlekelwe njalo kuzakubanzima ukuvala isikhexe sakhe,akwandanga ukuthola abantu abanjengaye ubelobuntu, ethanda abantu, engakhethi muntu,” kutsho uMnu Nyathi.
UNyathi wazalwa mhlaka 28 Mpandula 1953 wafunda izifundo zakhe zaphansi eShape , Gungwe, Ratanyane lase Connemara Primary School .Wasesiya qedisa izifundo zake e Fatima ngo1970.
wangena kumpi yenkululeko ngo1976, eseqedile izifundo zakhe wahanjiswa eFC Camp emele ezokulima ngoba ubeqeqetshe kwezokulima.
Nyathi wahamba empini ngo1976 wathi ngemva kukazibuse ngo1981 wangena kubutho eMasvingo waqansa ngezikhundla engumlimi waba nguCaptain wasethatha umhlalaphansi ngo1995 selesikhundla sikaMajor.
Ngesikhathi ebhubha ubengumsekeli kamgcinisihlalo weZimbabwe Land Commission.
Utshiye amakhosikazi amabili labantwana abalitshumi.—𝑵𝒕𝒆𝒑𝒆-𝑴𝒂𝒏𝒂𝒎𝒂𝑭𝑴.
