29 Nkwenkwenzi 2024.
Ngu- MILTON MASHASHA
NTALALE- Kufe oyedwa abanye balimala kungozi yethalakitha eChibi, eNtalale eGwanda South ngoMvulo ebusuku.
UNkosikazi Kitumetsi Ndebele oleminyaka yokuzalwa engamatshumi amahlanu lanye(51), ubhubhe ngemva kokutshelela phezulu kwethalikitha ababeyigadile wawela phansi kwayo yamgxoba wafela khonapho, bevela hola umumbu weziphaleni zeGMB eTshongwe.
Ingozi le iyenzakala duze leTshongwe (B) ngesikhathi sehola lesificamunwe munye ntambama lapho abantu befake amasaka abo kunqola ebidonswa yithalakitha (trailer) aqonga phezulu abanye bawela phansi balimala.
Isikhulumeli samapholisa eZansi yemaNdebeleni UNkosikazi Loveness Mangena uthe loludaba alukafiki endlebeni zakhe.
Umsakazo kazulu iNtepe Manama Community Radio uxoxe loNkosikazi Keneiloe Msendami oyisakhamuzi sakoChibi obengomunye obegade leyo thalakitha.
“Besisanda kudlula eTshongwe (B) lapho kube lokugudluzeka okuthize kuthalakitha kabili kathathu andubane icitshe, mina bengihlezi ekhanda le thalakitha kumtshayela, ngisizwa lokho ngathi kumtshayeli misa ithalakitha abantu bayalimala, wayeqa ngoba vele ibisicitshile yama yodwa, sathola ukuthi kulabantu abalele phansi, sakhanyisa sathola umufi elele ngesisu ekhangela phansi okutshengisa ukuthi ngemva kokutshelela phezulu uye wayawela phambili kwevili lenqola ebidonswa yithalakitha yadlula imgxoba ngobunzima bamasaka omumbu yahle yamlimaza nanko ubephuma igazi elinengi kakhulu wahle wafela khonapho.”
Lelithalakitha belithwele abantu abafika itshumi lanhlanu njalo UMnu. Praise Ngozo owakoChibi kanye loNkosikazi Soneni Mafu balimala kakubi kwathi inengi lahluzuka nje kancane.
Udadewabo kamufi uKeratile Ndebele uthi badane kakhulu ngalesisehlakalo njalo abantwabakhe sebezintandane.
” Lokhu kuyenzakele singakhangelele, umkakhe sewasitshiya yena nguye obesele enakekela abantwana bakhe, yisikhathi esinzima kakhulu kithi, kungenani njengemuli siyakwamukela, nxa isikhathi sesifikile kakho ongakumisa.”
UKitumetsi Ndebele utshiye ingane zakhe ezimbili , owokuqala oleminyaka engamatshumi amabili lasikhombisa kuthi omlandelayo uleminyaka engamatshumi amabili lanye.
@𝑵𝒕𝒆𝒑𝒆-𝑴𝒂𝒏𝒂𝒎𝒂𝑭𝑴
