05 Nhlangula 2024
Ngu Reaboka J Nare Ward 12 Focal Person.
GWANDA SOUTH -Izakhamizi zikaWard 12 bezithe gwaqa zihlafuna udaba olumayelana lokuphiwa indawo kwamankazama aphenduka emendweni lapho kube lemibono etshiyeneyo abanye bevumelana lodaba kukanti abanye bephikisana lalo.
UKhumbulani Sitiboli oyisakhamuzi uthe kusadliwa ngoludala amankazama esiya ekwendeni ayehle akhitshwe emulini azalwa kiyo anikelwe lapho ayendela khona.
“Kudala odadewethu nxa babe phuma besiyakwenda babephuma nge bhokisi elincane kutshengisa ukuthi akaselalo incwaba lapha ekhaya, ingcwaba lakhe selilapho ayendela khona njalo umnganu wawubulawa okutshengisela ukuthi okwakhe sezakuthola emendweni,” kutsho uSitoboli.
Ubuye wagcizelela esithi amankazana aphenduka emendweni akufanelanga atshayelwe ihlahla.
“Ngokunjalo abalalo ilungelo lokutshayelwa ihlala nxa sebevela emendweni ngoba sebakhutshwa kumdeni. Kwakuthi nxa besiya kwenda balaywe ukuthi emendweni kuyabekezwelwa loba kunzima, lokhu kwakusenza inani labaphendukayo libelincane”.
UJustice Muhaphu uthe amantombazane aphenduka emendweni alelungelo lokuphiwa indawo zokuthi bakhe.
“Mina ngokubona kwami kumele bephiwe indawo yabo eqondane labo lapho abazazitshayela eyabo imithetho ukwenzela ukuthi kungabi lezingxabano emagumeni loba ukucina sebechitha imizi yabanye. Njalo kumele bephiwe emanxuweni ngoba abanye babo bacina sebesukile baya kwezinye indawo kucine sekubangela ukuthi kube lamanxuwa amanengi esigabeni,” kusitsho uMahaphu.
UBekezela Moyo usekele wathi amankazana alelungelo lokuphiwa indawo zokuhlala ukwenzela ukuthi benelise ukondla kuhle imuli zabo.
“Ngibona kulilungelo labo ukuthi baphiwe indawo zokwakha ukwenzela ukuthi nxa besedlula emhlabeni batshiyele abantwana babo indawo yokuthi basale befihla ikhanda,” kutsho uMahaphu.
UReason Wadenga oyisakhamuzi seGungwe uthe umuntu oleminyaka enelisa ukuthi athathe isithupha ulelungelo lokuzakhela umuzi wakhe.
“Ngibona kufanele ukuthi umuntu wonke oselesithupha, esenelisa ukuzinakekela ulelungelo lokuzakhela umuzi wakhe, njalo ulelungelo lomhlabathi,” kutsho u Wadenga.
Ubaba uOrders Siphali uthe kuqakathekile ukuthi kuhlolisiswe izizatho eziyabe zenze amankazana aphenduke ekwendeni andubana baphiwe indawo zokuhlala.
“Okwakuqala kumele sidingisise ukuthi emendweni bakhitshwe yini, leminyaka yabo ukuthi iyavuma ukuthi babe ngomazakhela yini ukwenzela ukuthi singaniki abantwana abancane izindawo ngoba bazacina besuka besiyazama ukwenda futhi,” kusitsho uSiphali.
“Mina njengo mhlali ngesaba ukuthi nxa singayekela ukudingisisa ukuthi basuswe yini emendweni kungaletha ukuchitheka kwemizi eminengi ngoba becina sebethathela abanye amadoda abo. Ngakho ke isuntu kasiqhutshwe njengokuba singahlanganiswa lemithetho yokuza”.
UKhomotsho Makhurane ongomkhulu wabosobhuku osebenzisana le nduna uthe nxa umtwana esephenduke emendweni ulalo ilungelo lokutshayelwa ihlahla.
“Nxa umntwana oyinkazana sephenduke emendweni ulalo ilungelo lokutshayelwa umunzi kuyikuthi labazali bakhe bemfuna ukumtshayela. Lokhu kuzabenelisa ukuthi bathole indawo yokuthi abantwana babo babe lapho abayafihla khona ikhanda nxa umama wabo sebhubhile. Njalo sikhangelele labo abaleminyaka engaba ngamatshumi amathathu lasikhombisa kusiya phezulu,” kutsho uMakhurane.—𝑵𝒕𝒆𝒑𝒆-𝑴𝒂𝒏𝒂𝒎𝒂𝑭𝑴
