BY DYLAN NARE
COMMUNITY REPORTER
HALISUPI – Zisele zikhuza imhlolo izakhamiziz zeHalisuphi ngemva kokuba umzukulu egwaze umalumakhe izihlalo kuviki eyephelileyo kubangwa utshani obemasimini.
UNhlanganiso Mayo oleminyaka yokuzalwa engamatshumi amabili lasitshiyagalombili ugwaze umalumakhe uMakhadi Sibanda kabuhlungu ezihlalweni ngesikela.
Elandisa lesi siga uMnu Sibanda uthe umzukulu wakhe ebejongo ukumbulala ngoba evele engaqali ukumhlukumeza.
“Ngithe ngisemasimi ngabona sekulomuntu osika utshani kwelinye icele. Nxa ngithi ngiyakhangelieisa ngibone nguNhlanganiso. Ngithe ngemva kokuqeda ebengikwenza ngasondela kuye ukuyakuzwa ukuthi usika ngaliphi engela mvumo yami.
Ngingakaqedi linkulumo yami ubesengitshaya ngenqindi ebusweni waseqeda wadobha lamatshe. Usuke wasengigwaza njalo, injongo yalumfana bekuyikumbulala ngoba engaqali ukungihlukumeza,” kutsho uSibanda.
USobhuku uSiyaphi Sibanda oke wahlalisa uNhlanganiso idare kumaviki amabili adlulileyo uthi usediniwe ngalundoda oyisiqoqodo.o
“Mina njengenkokheli yalesisigaba sengimsusa ezandleni zami ngimusa kwabomthetho ngoba ngingaselawo amandla okuthonisa amacala anje.
Ngilovalo olukhulu ngoba akwaziwa ukuthi uzathi esuka lapha uzayenza cala bani ngoba ukhanya engakhuzeki eqhubekela phambili,” kutsho uSobhuku uSibanda.
Izakhamizi kulesisigaba zithi sezidlela evalweni ngoba zingazi ukuthi olandelayo ngubani.
