GWANDA – Inengi elikhulume ngeSonto lapho kubekwa uJudith Moyo Sikhwili likhumbule imisebenzi kayise uMnu. Sikhwili Kohli Moyo yena owafa ngomnyaka ka1999 waphiwa isicoco sokuba liqhawe lesizwe.
Indodakazi yakhe uJudith obhubhe kuviki eyedlulileyo ubekwe ngeSonto eGwanda lapho achazwe njengomuntu obesebenza gadalala njalo ezimisele ukuthuthukisa ibhizimusi lakhe.Ufe eleminyaka yokuzalwa engamatshumi amane lasitshiyangalombili.
UMnu Tshinga Dube owakhokhela ibutho leZipra ngesikhathi sempi yenkululeko njalo elilunga lePolitburo kubandla leZanu PF ukhulume kabanzi ngoSikhwili.
“USikhwili wayengutitsha hayi utitsha lo ophatha itshoko , amatistha amakhulu ayesifundisa ukuthi thina sibotshiwe siyizigqili asivukeni sizikhulule yikho edume kangaka usekaJudy.
Umdala uSikhwili wasebenza okumangalisayo ehamba ngenyawo ethengisa amakhadi eParty yakuqala okwakuthiwa yiZAPU waze wanikwa iScooter ayehamba ngaso ethengisa amakhadi wasesuka ke sesiya eZambia wafika walithela khonale ivangeli leParty.”
UDube uthi babezwanana kakhulu loSikhwili waze wamthengela lebhatshi.
“Ngasengisuka ke sengisiya eRussia ngamthengela ibhathsi eliyiScotch ayelithanda kakhulu, ungabona imfanekiso yakhe yonke libhatshi engamthengela lona ,lalingaphumi lelo lephalamende langaphi.
Umdala uSK yikuthi nje ubuqhawe buyaphiwa kanye kodwa laba abantu yibo okwakumele baphiwe ubuqhawe kathathu ngoba baqala ukusebenza kungakavuthwa.
UMnu Richard Ndlovu olilunga ledale lePolitburo kubandla leZanu PF ngomunye wabakhulumileyo
“Sihlonipa ubaba uSikhwili Moyo yikho njengeParty siphakamile sasukuma ukuthi lintombi sizoyiphelekezela.Ubaba uTshinga Judge Dube yindoda eyahamba ngo1961 ubaba uSikhwili wahamba ngo1961 bayahlangana eZambia, yokinto kuze kuthathwe ilizwe leli bonke ukukhalipha lwaphuma kulawa madoda.”
UTshinga uphinde wathi kuyadingeka ukuthi uhulumende anakekele ngokugcweleyo intandane zamaqhawe esizwe.
Umphantintambo obona ngezenzakala kweleZansi yemaNdebeleni UMnu. Abednico Ncube laye ugcizelele esithi uSikhwili wasebenza gadalala ukuze eleZimbabwe, uthi njalo badabukile ngokudlula kwendodakazi yakhe.
UJudith Moyo Sikhwili wazalwa ngomnyaka ka1973 kweleTanzania njalo utshiye indodana eyodwa.
UNkosikazi Thandi Ibrahim indodakazi kaJoshua Nkomo, lekhosikazi likaLookout Masuku labo bebekhona emfeni.
