04 Mabasa 2024
Ngu Milton Mashasha
Kudaba olutshiye abazalwane bedidekile, njalo bethithibele lapho amadoda amabili awe Ntalale engene enkonzweni athethisa, athembisa ukubhuqa bazalwane abekade buthene bethakazelela ikhefu lephasika.
Amadoda lawa womathathu athiwa nguLinky Sibanda lomngane wakhe uMbongeni Ntini. Bangena enkonzweni ye New Apostolic Church bedakiwe bathuka abazalwane ngenhlamba ezingeke zibhalwe emsakazweni kazulu. Njalo bathembisa ukutshaya abazalwane, ukuba baqale inkonzo bengekho.
Kubikwa amajaha lawa aleminyaka engaphakathi kwetshumi lesitshiyagalombili kusiya kumatshumi amabili lambili yokuzalwa. Indaba ucine iphoqa abafundisi ukuba bamise inkonzo yabo adubana bebhekane lalesisiga asasibavelele.
Umsakazo kazulu, uxhumane lomunye wabafundisi balelo bandla uJames Sebata otshengise ukudana ngesenzo lesi.
“Abafana laba sibone sebephakathi kwetende bekhuluma inhlamba bethethisa wonke umuntu besithembisa ukusitshaya,sahle sayekela ukuqhubekela phambili ngenkonzo ukuze kukhawulwe lelohlazo. Ngiphelelwe njengomfundisi ukuthi kanti yisenzo bani lesi thina sithakazelela ukufa lokuvuka kukaJesu ngephasika,”kutsho u Sebata.
Omunye walelo bandla uEdina Nyathi uthi amadoda laa amise inhlelo zonke zebandla njalo bebengazimiselanga ukuba yingxenye yombuthano bebelande ukuzothuka.
“Ngithe ngifika esontweni yethu bangena baqala ukuthethisa wonke umuntu obephakathi befuna ukusitshaya. Umsindo wabamba nki kwaze kwamiswa ihlelo zentshumayeli kwaqala amaqhinga okubakhipha phakathi esontweni. Isehlakalo lesi silethe ihlazo esontweni njalo ngimadolonzima ngilapha, kukhanya bebebhudle intombi kagwebu,” kutsho uNyathi.
Umsakazo kazulu wenelisile ukuxhumana lomunye wabasolwa uSibanda esithi uyazisola.
“Angikwazi ukuthi kuhambe njani kwenzakeleni kodwa ngiyazisola kakhulu ngalesisehlakalo ngilokuxolisa okukhulu ngisenzo lesi,” kutsho uSibanda.
Umsakakazo awenelisisanga ukuthitha uNtini kodwa amalunga omdeni atshengise ukudana ngesenzo sakhe.Ntepe-ManamaFM
