BY Siphathisiwe Ncube
Community Reporter
GWANDA – Inhlanganiso yeWorld Vision ithi ilenjongo yokuthuthukisa ezemfundo esiqintini seGwanda njalo izalwisa ngamandla ukuthi luphele udlame ebantwaneni ngokuphatheka kunhlelo ezitshiyeneyo.
Lokhu kuvele kuviki eyedlulileyo lapho kuvulwa ngokusemthethweni izindlu zabafundi ezine ezikolo zeNtalale Primary School eGwanda South kanye leWilikisa Primary eGwanda North ezakhiwe ngoncedo oluvele kunhlanganiso yeWorld Vision.
Ekhuluma kulimbuthano obona ngenhlelo zeWorld Vision emangweni wemaNdebeleni uMnu. Shepard Mavuso Dlamini uthe injongo yabo yikusiza izigaba igxile kakhulu ebantwaneni ukuze bafunde bathuthukise izigaba zabo.
“Ngaphandle kokuswelakala kwezindlu zokufundela ezikolo ezinengi , inani labafundi abazahlala endlini eyodwa lizayehla okuzadala ukuthi abafundi bengasondelelani ngalesisikhathi seCovid 19 njalo abantwana bafundele endaweni ezinhle ukuze babambe lokhu abakufundiswayo.
“Silama Talking Walls kulezizakhiwo abonwa ngumntwana lomzali akhuluma ngokuvikelwa kwabantwana ukuze asize ekuguquleni igqondo yabantu mayelana ngokudlwengulwa kwabantwana lokulondolozwa amalungelo abo.”
UMqondisi wogatsha lwezemfundo eZansi yemaNdebeleni uNkosikazi Beatrice Manjere uthe bayazigqaja ngobundlelwano babo leWorld Vision ekuthuthukiseni abafundi bemaphandleni.
“Njengogatsha lwezemfundo silokujabula okukhulu ngokubona umsebenzi ongaka oqhutshwa yiWorld Vision, sonke siyibonile imsebenzi eqhutshwe yinhlanganiso le ekuthuthukiseni abantwana, basebenza gadalala ukuthuthukisa ezemfundo ngendlela ezitshiyeneyo njengoba lamhlanje sibona lezizakhiwo.
ENtalale iWorld Vision iyakhe izindlu zokufundela ezimbili yathenga amatafula alikhulu lezitulo ezilikhulu yathengela njalo ababalisi amatafula amabili lezitulo zabo.
EWilikisa iyakhe njalo izindlu ezimbili zabafundi yathenga izitulo ezingamatshumi ayisitshiyangalombili lamatafula akhona agoqela lawabafundi bemfundo yaphansi aweECD, iphinde yathenga lamatafula ababalisi ababili lezitulo zabo.
Izakhamizi zona ziphathise ekutshayeni izitina lokwakha lezizindlu zabafundi.
UManjere uthi lezizikolo sokumele zibe lempumela engcono kumihloliso ngoba abafundi sebezafunda betshaywa ngumoya.
Inengi labantu elikhulume kulimbuthano yomibili lithe liswela imilomo ezinkulungwane yokubonga lumsebenzi.
NMCR #2021
